മലപ്പുറത്ത് കുടുംബ കോടതിക്ക് സ്വന്തം കെട്ടിടം പണിയാന്‍ ആഭ്യന്തരവകുപ്പ് ഒടുവില്‍ ഭരണാനുമതി നല്‍കി.പൊതുമരാമത്തുവകുപ്പ് കെട്ടിടവിഭാഗം ചീഫ് എന്‍ജിനീയറുടെ എസ്റ്റിമേറ്റിന്റെ അടിസ്ഥാനത്തില്‍ ഹൈക്കോടതി രജിസ്ട്രാര്‍ നല്‍കിയ അപേക്ഷയെത്തുടര്‍ന്നാണ് അനുമതി.ഇനി പൊതുമാരമത്തുവകുപ്പ് സാങ്കേതികാനുമതി നല്‍കണം. തുടര്‍ന്ന് ടെന്‍ഡര്‍ വിളിക്കും. കളക്ടറേറ്റ് വളപ്പില്‍ വിവിപാറ്റും വോട്ടിങ് യന്ത്രങ്ങളും സൂക്ഷിക്കാന്‍ നിര്‍മിച്ച കെട്ടിടത്തിനുചേര്‍ന്നുള്ള 32 സെന്റില്‍ 12 കോടി രൂപയ്ക്കാണ് നാലുനിലക്കെട്ടിടം പണിയുന്നത്. വാഹന പാര്‍ക്കിങ്ങും കോടതി ഹാളും ജഡ്ജിയുടെ ചേംബറും ഓഫീസും കേസിനുവരുന്ന അമ്മമാര്‍ക്ക് വിശ്രമകേന്ദ്രവും കൗണ്‍സലിങ് ഹാളും അടക്കമുള്ള സംവിധാനമാണ് ഒരുങ്ങുന്നത്.
