അബ്കാരി കേസിൽ റിമാൻഡിൽ കഴിയുന്ന റിപ്പോർട്ടർ ടി.വി. മാനേജിങ് എഡിറ്റർ ആന്റോ അഗസ്റ്റിന്റെ വയനാട് വാഴവറ്റയിലെ വീട്ടിലെ സിസിടിവി ദൃശ്യങ്ങൾ ഇല്ലെന്ന് എക്സൈസ്. വീട്ടിലെ 22 ക്യാമറകളിലും ദൃശ്യങ്ങളില്ലെന്നാണ് എക്സൈസിന്റെ കണ്ടെത്തൽ. ദൃശ്യങ്ങൾ സൂക്ഷിച്ചിരുന്ന ഡിവിഡി സ്റ്റോറേജ് എടുത്തുമാറ്റിയ നിലയിലാണെന്നും പരിശോധനയിൽ കണ്ടെത്തി.
ആന്റോ അഗസ്റ്റിന്റെ സാന്നിധ്യത്തിൽ വീട്ടിൽ നടത്തിയ പരിശോധനയിലാണ് കണ്ടെത്തൽ. തെളിവ് നശിപ്പിച്ചതാണോയെന്ന സംശയവും എക്സൈസ് ഉന്നയിക്കുന്നുണ്ട്.
അതേസമയം, വാഴവറ്റയിലെ വീടിന്റെ വൈദ്യുതി കണക്ഷൻ ആന്റോ അഗസ്റ്റിന്റെ പേരിലാണെന്ന് തെളിയിക്കുന്ന രേഖകൾ എക്സൈസിന് ലഭിച്ചു. ഒടുവിലത്തെ വൈദ്യുതി ബില്ലും ആന്റോയുടെ പേരിലാണ് അടച്ചതെന്നും കണ്ടെത്തി.
വാഴവറ്റയിലെ വീട് തന്റേതല്ലെന്ന വാദത്തിൽ ആന്റോ അഗസ്റ്റിൻ ഉറച്ചുനിൽക്കുകയാണ്. എന്നാൽ ജി.എസ്.ടി വകുപ്പിന് നൽകിയ മൊഴിയിലെ വിലാസം വാഴവറ്റയിലെ ഇതേ വീടിന്റേതാണെന്നും എക്സൈസ് ചൂണ്ടിക്കാട്ടുന്നു.
അനധികൃത നിർമാണം ഉൾപ്പെടെയുള്ള കാര്യങ്ങളും കസ്റ്റഡി അപേക്ഷയിൽ എക്സൈസ് ഉയർത്തിക്കാട്ടും. മജിസ്ട്രേറ്റിന് മുന്നിൽ ഹാജരാക്കിയ ആന്റോ അഗസ്റ്റിനെ റിമാൻഡ് ചെയ്ത് മാനന്തവാടി ജില്ലാ ജയിലിലേക്ക് മാറ്റിയിരുന്നു.
ആന്റോ അഗസ്റ്റിന്റെ ജാമ്യാപേക്ഷ നാളെ ഹൈക്കോടതി പരിഗണിക്കും.
