മലപ്പുറം: കൊണ്ടോട്ടിയിലെ മലഞ്ചരക്ക് കടയിൽ നിന്ന് 18,000 രൂപ മോഷ്ടിച്ച പ്രതിയെ മണിക്കൂറുകൾക്കകം പിടികൂടി പൊലീസ്. കണ്ണൂർ ശിവപുരം മാലൂർ സ്വദേശി ഹാരിസ് (47) ആണ് പിടിയിലായത്. പെരിന്തൽമണ്ണയിൽ നിന്നാണ് കൊണ്ടോട്ടി പൊലീസ് ഇയാളെ കസ്റ്റഡിയിലെടുത്തത്.
കൊണ്ടോട്ടി ബസ് സ്റ്റാൻഡിന് സമീപത്തെ ടി.എം ട്രേഡേഴ്സിലായിരുന്നു മോഷണം. കഴിഞ്ഞ ദിവസം ഉച്ചയ്ക്ക് രണ്ടുമണിയോടെ ജീവനക്കാരും ഉടമയും കടയിലില്ലാത്ത സമയം നോക്കി അകത്തുകയറിയ പ്രതി ക്യാഷ് കൗണ്ടറിലെ വലിപ്പ് തുറന്ന് 18,000 രൂപ മോഷ്ടിച്ച് കടന്നുകളയുകയായിരുന്നു.
കടയുടമ തിരിച്ചെത്തി പണം നഷ്ടപ്പെട്ട വിവരം മനസ്സിലാക്കിയതോടെ പൊലീസിൽ പരാതി നൽകി. തുടർന്ന് പൊലീസ് കടയിലെയും പരിസരത്തെയും സി.സി.ടി.വി ദൃശ്യങ്ങൾ കേന്ദ്രീകരിച്ച് അന്വേഷണം നടത്തി. ലഭിച്ച സൂചനകളുടെ അടിസ്ഥാനത്തിൽ പ്രതിയെ തിരിച്ചറിയുകയും മണിക്കൂറുകൾക്കകം പെരിന്തൽമണ്ണയിൽ നിന്ന് പിടികൂടുകയുമായിരുന്നു.
മോഷ്ടിച്ച പണവും പ്രതിയിൽ നിന്ന് പൊലീസ് കണ്ടെടുത്തു. കണ്ണൂർ ജില്ലയിലും ഹാരിസ് മോഷണക്കേസിൽ പ്രതിയാണെന്ന് പൊലീസ് അറിയിച്ചു. തുടർന്ന് മോഷണം നടന്ന കടയിലെത്തിച്ച് തെളിവെടുപ്പും നടത്തി.
