ഡൽഹിയിൽ വായുമലിനീകരണം അതീവഗുരുതര നിലയിലേക്ക്. ശരാശരി വായു ഗുണനിലവാര സൂചിക 350 കടന്നതോടെ രാജ്യതലസ്ഥാനത്ത് ജനജീവിതം ദുരിതത്തിലായി. പലയിടങ്ങളിലും മലിനീകരണ തോത് 400 കടന്നു. ധോല ക്വാ മേഖലയിൽ ഇന്ന് രാവിലെ രേഖപ്പെടുത്തിയത് 417 ആണ്. ഗാസിപൂരിൽ 410-ഉം രേഖപ്പെടുത്തി.
അടുത്ത ദിവസങ്ങളിൽ മലിനീകരണ തോത് ഇനിയും ഉയർന്നേക്കുമെന്നാണ് വിലയിരുത്തൽ. ഇതോടെ ഡൽഹിയുടെ അതിർത്തികളിൽ പൊലീസ് പരിശോധനയും നിയന്ത്രണങ്ങളും കർശനമാക്കി.
വായുമലിനീകരണം നിയന്ത്രിക്കുന്നതിന്റെ ഭാഗമായി രാജ്യതലസ്ഥാന മേഖലയിൽ നാളെ മുതൽ കടുത്ത നിയന്ത്രണങ്ങൾ നിലവിൽ വരും. നിർമാണ, പൊളിക്കൽ പ്രവർത്തനങ്ങൾക്ക് നിരോധനം ഏർപ്പെടുത്തിയിട്ടുണ്ട്. സർക്കാർ, സ്വകാര്യ ഓഫീസുകളിൽ നേരിട്ട് ഹാജരാകേണ്ട ജീവനക്കാരുടെ എണ്ണം 50 ശതമാനമായി പരിമിതപ്പെടുത്തി.
ഈ മാസം 20-ാം തീയതി വരെയാണ് നിയന്ത്രണങ്ങൾ ഏർപ്പെടുത്തിയിരിക്കുന്നത്. ഇതുസംബന്ധിച്ച് ഡെപ്യൂട്ടി കമ്മിഷണർ ഉത്തരവിറക്കി.
വായുമലിനീകരണം രൂക്ഷമായി തുടരുന്നത് ഡൽഹിയിലെ ആരോഗ്യ-ദൈനംദിന ജീവിതത്തെയും പ്രതികൂലമായി ബാധിക്കുകയാണ്.
