തമിഴ് സിനിമാലോകത്ത് ഈ വർഷം ഏറ്റവും കൂടുതൽ കാത്തിരിപ്പ് ഉയർത്തിയ ചിത്രങ്ങളിലൊന്നാണ് വിജയ് നായകനായ ജനനായകൻ. പൊങ്കൽ റിലീസായി ജനുവരി 9ന് എത്തുമെന്ന് പ്രഖ്യാപിച്ചിരുന്ന ചിത്രം സെൻസർ സംബന്ധമായ പ്രശ്നങ്ങളെ തുടർന്ന് റിലീസ് മാറ്റിവെക്കുകയായിരുന്നു.
ആരാധകരുടെ നീണ്ട ആറ് മാസത്തെ കാത്തിരിപ്പിന് വിരാമമിട്ട് ചിത്രം ഈ മാസം 23ന് തിയറ്ററുകളിൽ എത്താൻ ഒരുങ്ങുകയാണ്. തമിഴ്നാട് തിരഞ്ഞെടുപ്പിന് മുൻപ് റിലീസ് ലക്ഷ്യമിട്ടിരുന്ന ചിത്രം ഇപ്പോൾ എത്തുമ്പോൾ, ചിത്രത്തിലെ നായകനായ വിജയ് തമിഴ്നാട് മുഖ്യമന്ത്രിയായെത്തുന്ന കാലഘട്ടത്തിലാണ് റിലീസ് എന്ന പ്രത്യേകതയും ശ്രദ്ധ നേടുകയാണ്.
കേരളത്തിലെ റിലീസുമായി ബന്ധപ്പെട്ട വിവരങ്ങൾ വിതരണക്കാരായ എസ്എസ്ആർ എന്റർടെയ്ന്മെന്റ്സ് പുറത്തുവിട്ടിട്ടുണ്ട്. ജനുവരി 23ന് പുലർച്ചെ 6 മണിക്ക് കേരളത്തിലെ ആദ്യ പ്രദർശനങ്ങൾ ആരംഭിക്കുമെന്ന് വിതരണക്കാർ അറിയിച്ചു.
നേരത്തെ വിജയ്, രജനികാന്ത് തുടങ്ങിയ താരങ്ങളുടെ വമ്പൻ ഹൈപ്പോടെ എത്തിയ ചിത്രങ്ങൾക്ക് കേരളത്തിൽ പുലർച്ചെ 4 മണി മുതലാണ് ആദ്യ ഷോകൾ നടന്നിരുന്നത്. പൊങ്കൽ റിലീസ് പ്രതീക്ഷിച്ചിരുന്ന സമയത്ത് ജനനായകന്റെ ആദ്യ പ്രദർശനവും പുലർച്ചെ 4 മണിയാകുമെന്ന് അറിയിച്ചിരുന്നെങ്കിലും പിന്നീട് സമയം 6 മണിയിലേക്ക് മാറ്റുകയായിരുന്നു.
രാഷ്ട്രീയ പ്രവേശനത്തിന്റെ ഭാഗമായി സിനിമയിൽ നിന്ന് പിന്മാറുകയാണെന്ന് പ്രഖ്യാപിച്ച വിജയിന്റെ അവസാന ചിത്രം എന്ന നിലയിൽ ജനനായകന്റെ ബോക്സ് ഓഫീസ് പ്രകടനം സിനിമാ ലോകം ആകാംക്ഷയോടെ കാത്തിരിക്കുകയാണ്. ചിത്രത്തിന്റെ വ്യാജ പതിപ്പ് നേരത്തെ പ്രചരിച്ചതും കളക്ഷനെ ബാധിക്കുമോ എന്നത് ശ്രദ്ധേയമാണ്.
കന്നഡ സിനിമയിലെ പ്രമുഖ ബാനറായ കെവിഎൻ പ്രൊഡക്ഷൻസ് നിർമ്മിക്കുന്ന ചിത്രത്തിൽ വിജയിനൊപ്പം മമിത ബൈജു, പൂജ ഹെഗ്ഡെ, പ്രകാശ് രാജ്, ബോബി ഡിയോൾ, ഗൗതം വസുദേവ് മേനോൻ, പ്രിയാമണി, നരെയ്ന് തുടങ്ങിയവരും അഭിനയിക്കുന്നുണ്ട്.
അനിരുദ്ധ് രവിചന്ദർ സംഗീതം ഒരുക്കുന്ന ചിത്രത്തിന്റെ ഛായാഗ്രഹണം സത്യൻ സൂര്യനും എഡിറ്റിംഗ് പ്രദീപ് ഇ രാഘവും നിർവഹിക്കുന്നു. പ്രൊഡക്ഷൻ ഡിസൈൻ വി സെൽവകുമാറാണ് കൈകാര്യം ചെയ്യുന്നത്.
