ബംഗളൂരു ബംഗളൂരുവില്‍ പുഷ്പ 2 റിലീസിനിടെ സ്‌ക്രീനിന് സമീപത്ത് പോയി തീപ്പന്തം കത്തിച്ചു. നാല് പേര്‍ പിടിയില്‍. ഇന്നലെ രാത്രി ബംഗളൂരുവിലെ ഉര്‍വശി തീയറ്ററില്‍ ഷോയ്ക്കിടെയാണ് സംഭവം നടന്നത്. സ്‌ക്രീനില്‍ പുശ്ഷപയായുള്ള അല്ലുവിന്റെ വരവ് കണ്ട് ആവേശം കൂടിയ ആരാധകര്‍ കയ്യില്‍ കരുതിയ തീപ്പന്തം കത്തിച്ചുകൊണ്ട് സ്‌ക്രീനിന് മുന്നിലേക്ക് എത്തുകയായിരുന്നു. തീയേറ്ററില്‍ ഉണ്ടായിരുന്ന മറ്റ് ആളുകളുടെ സമയോചിതമായ ഇടപെടല്‍ കൊണ്ട് വലിയ അപകടം ഉണ്ടായില്ല. സംഭവത്തില്‍ 4 പേരെ പൊലീസ് അറസ്റ്റ് ചെയ്തു.
പുഷ്പ 2 -ന്റെ പ്രീമിയര്‍ ഷോയ്ക്കിടെ ഉണ്ടായ തിക്കിലും തിരക്കിലും പെട്ട് ഒരു സ്ത്രീ മരിച്ചു. ഹൈദരാബാദിലെ സന്ധ്യ തിയേറ്ററിലാണ് സംഭവം. ഹൈദരാബാദ് ദില്‍ഷുക്‌നഗര്‍ സ്വദേശിനി രേവതി (39) യാണ് മരിച്ചത്. പുഷ്പയുടെ പ്രീമിയര്‍ ഷോ കാണാന്‍ ഭര്‍ത്താവ് ഭാസ്‌കറിനും മക്കള്‍ക്കും ഒപ്പം എത്തിയതായിരുന്നു മരിച്ച യുവതി.
രാത്രി 11 മണിക്ക് ഉള്ള പ്രീമിയര്‍ കാണാന്‍ അല്ലു അര്‍ജുനും സംവിധായകന്‍ സുകുമാറും എത്തുമെന്ന് അവസാന നിമിഷമാണ് വിവരം ലഭിച്ചത്. അല്ലു അര്‍ജുനെ കാണാന്‍ തിയേറ്റര്‍ പരിസരത്ത് എത്തിയ ആരാധകക്കൂട്ടം കാരണം വലിയ ഉന്തും തള്ളുമുണ്ടായി. ആള്‍ക്കൂട്ടത്തെ നിയന്ത്രിക്കാന്‍ പൊലീസ് ലാത്തി വീശുകയായിരുന്നു. ഇതിനിടയില്‍ പെട്ടാണ് സ്ത്രീ മരിച്ചതെന്ന് ദേശീയ മാധ്യമമായ ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു.
