ന്യൂഡല്ഹി: നോട്ട് നിരോധനം കള്ളപ്പണം ഇല്ലാതാക്കാനുള്ള പ്രധാന നടപടികളില് ഒന്നാണെന്ന അവകാശവാദം ആവര്ത്തിച്ച് കേന്ദ്രസര്ക്കാര്. സുപ്രീംകോടതിയില് സമര്പ്പിച്ച പുതിയ സത്യവാങ്മൂലത്തിലാണ് നോട്ട് നിരോധനം സംബന്ധിച്ച പഴയ വാദങ്ങള് സര്ക്കാര് ആവര്ത്തിച്ചത്.
500, 1000 നോട്ടുകല് പിന്വലിക്കാന് റിസര്വ്ബാങ്ക് ശുപാര്ശ ചെയ്തിരുന്നെന്നും ഇതിന്റെ അടിസ്ഥാനത്തിലാണ് നോട്ട് നിരോധന വിജ്ഞാപനം പുറപ്പെടുവിച്ചതെന്നും പറയുന്നു.
2010-2011 മുതല് 2015-2016 വരെ 500 ന്റെ നോട്ടുകളുടെ വിനിമയത്തില് 76.4 ശതമാനത്തിന്റെയും ആയിരത്തിന്റെ വിനിമയത്തില് 109 ശതമാനത്തിന്റെയും വര്ധനയുണ്ടായി. ഈ സാഹചര്യത്തില്, കള്ളപ്പണം വെളുപ്പിക്കലും വ്യാജനോട്ടടിയും അനധികൃത സാമ്പത്തിക ഇടപാടുകളും നിയന്ത്രിക്കുകയെന്ന ലക്ഷ്യത്തോടെയാണ് സര്ക്കാര് പഴയ നോട്ടുകള് പിന്വലിച്ച് പുതിയ സീരീസ് പുറത്തിറക്കിയതെന്നും ധനമന്ത്രാലയം ഡെപ്യൂട്ടി സെക്രട്ടറി സമര്പ്പിച്ച സത്യവാങ്മൂലത്തില് അവകാശപ്പെട്ടു. വിശദമായ സത്യവാങ്മൂലം സമര്പ്പിക്കാത്ത കേന്ദ്രസര്ക്കാരിനെ സുപ്രീംകോടതി രൂക്ഷമായി വിമര്ശിച്ചിരുന്നു.