വനത്തില്‍ തേനെടുക്കാന്‍ പോയ ആദിവാസി സംഘത്തിലെ പിഞ്ചുകുഞ്ഞ് ഉള്‍പ്പെടെ രണ്ടുപേര്‍ അപകടത്തില്‍ മരിച്ചു. മൂപ്പൈനാട് പരപ്പന്‍പാറ ചോലനായ്ക്ക കോളനിയിലെ വലിയ വെളുത്തയുടെ മകന്‍ രാജന്‍ (47), നിലമ്പൂര്‍ കുമ്പളപ്പാറ കോളനിയിലെ സുനിലിന്റെ നാല്? മാസം പ്രായമുള്ള ആണ്‍കുട്ടി എന്നിവരാണ് മരിച്ചത്.
നിലമ്പൂര്‍ അതിര്‍ത്തിയിലെ വനത്തിലാണ് സംഭവം. രാജന്‍ തേനെടുക്കുന്നതിനിടെ താഴെ വീഴുകയായിരുന്നു. ഇതുകണ്ട് അടുത്തേക്ക് ഓടിയ ബന്ധുവായ യുവതിയുടെ കൈയ്യിലുണ്ടായിരുന്ന കുട്ടി താഴ്ചയിലെ കാട്ടരുവിയിലെ പാറക്കെട്ടിലേക്ക് തെറിച്ചുവീണ് മരണപ്പെടുകയായിരുന്നുവെന്നാണ് കൂടെയുണ്ടായിരുന്നവര്‍ പറയുന്നത്.
അതേസമയം, ഇവരെ തേനീച്ച ആക്രമിച്ചതിനെ തുടര്‍ന്നാണ് അപകടമുണ്ടായതെന്ന് ചിലര്‍ പറയുന്നു. വനത്തിന്റെ ഉള്‍ഭാഗത്ത് നടന്ന അപകടമായതിനാല്‍ പുറംലോകം വിവരമറിയാന്‍ ഏറെ വൈകി. തുടര്‍ന്ന് മേപ്പാടി പൊലീസും ഫയര്‍ഫോഴ്‌സും പള്‍സ് എമര്‍ജന്‍സി ടീം അംഗങ്ങളും ചേര്‍ന്നാണ് മൃതദേഹങ്ങള്‍ പുറത്തെത്തിച്ചത്. മൃതദേഹങ്ങള്‍ പാടിവയല്‍ സാമൂഹികാരോഗ്യ കേന്ദ്രത്തില്‍ സൂക്ഷിച്ചിരിക്കുകയാണ്. സുല്‍ത്താന്‍ ബത്തേരി ഗവ. ആശുപത്രിയില്‍ എത്തിച്ച് പോസ്റ്റ് മോര്‍ട്ടം നടത്തും.
