ഷാർജ: ഷാർജയിൽ മലയാളി യുവ ദന്ത ഡോക്ടർ കുഴഞ്ഞുവീണ് മരിച്ചു. തൃശൂർ സ്വദേശിനിയായ 32കാരി ഡോ. അഫീന റഹീം ആണ് മരിച്ചത്. അൽ ഖാസിമിയയിലെ താമസസ്ഥലത്ത് തിങ്കളാഴ്ച രാവിലെയായിരുന്നു സംഭവം.
രണ്ട് ചെറിയ കുട്ടികളുടെ അമ്മയായ അഫീന, മക്കളെ പരിചരിക്കുന്നതിനായി ജോലിയിൽ നിന്ന് താൽക്കാലികമായി വിട്ടുനിൽക്കുകയായിരുന്നു. അധ്യാപകനായ ഭർത്താവ് യാസർ സ്കൂളിലേക്ക് പോയ സമയത്തായിരുന്നു അഫീന വീട്ടിൽ കുഴഞ്ഞുവീണത്.
വീട്ടിലുണ്ടായിരുന്ന ഭർതൃസഹോദരി റംഷീന, കുട്ടിയുടെ കരച്ചിൽ കേട്ട് ഉണർന്ന് നോക്കിയപ്പോഴാണ് അടുക്കളയിൽ അഫീനയെ കുഴഞ്ഞുവീണ നിലയിൽ കണ്ടെത്തിയത്.
ഉടൻ തന്നെ റംഷീന സിപിആർ നൽകുകയും ആംബുലൻസ് വിളിച്ചുവരുത്തുകയും ചെയ്തു. തുടർന്ന് സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
അഫീനയ്ക്ക് മറ്റ് ആരോഗ്യപ്രശ്നങ്ങളോ അസുഖങ്ങളോ ഉണ്ടായിരുന്നില്ലെന്ന് ഭർത്താവ് യാസർ പറഞ്ഞു. മരണകാരണം വ്യക്തമല്ല. സംഭവവുമായി ബന്ധപ്പെട്ട നിയമനടപടികളും ഔദ്യോഗിക രേഖകളും പൂർത്തിയാക്കിയ ശേഷം മൃതദേഹം നാട്ടിലെത്തിക്കാനുള്ള നടപടികൾ പുരോഗമിക്കുകയാണെന്ന് ബന്ധുക്കൾ അറിയിച്ചു.
