ന്യൂഡല്‍ഹി: അനില്‍ കെ ആന്റണിയുടെ പ്രസ്താവനയ്‌ക്കെതിരെ പ്രതികരണവുമായി എസ്എഫ്‌ഐ അഖിലേന്ത്യ പ്രസിഡന്റ് വി പി സാനു. ഇവിടെ ചര്‍ച്ച ചെയ്യുന്നത് ബിബിസിയെ കുറിച്ചല്ലെന്നും ഇന്ത്യയില്‍ നടന്ന ഒരു വംശഹത്യയെ കുറിച്ചാണെന്നും വി പി സാനു പറഞ്ഞു. കശ്മീര്‍ ഇല്ലാത്ത ഇന്ത്യന്‍ ഭൂപടം പലതവണ പ്രസിദ്ധീകരിച്ച മാധ്യമമാണ് ബിബിസിയെന്ന എ കെ ആന്റണിയുടെ മകന്‍ അനില്‍ കെ ആന്റണിയുടെ പ്രസ്താവനയ്‌ക്കെതിരെയായിരുന്നു മറുപടി.
ഈ വിഷയവുമായി ബന്ധപ്പെട്ട് ബിബിസി കൂടുതലായി ഒന്നും പറഞ്ഞിട്ടില്ല. നിലവില്‍ രാജ്യത്ത് ചര്‍ച്ച ചെയ്തിട്ടുള്ള ജനങ്ങള്‍ക്ക് അറിയാവുന്ന വസ്തുതകളാണ് ബിബിസി പറഞ്ഞത്. എന്നാല്‍ കോടതിയുടെ മുമ്പില്‍ എത്താതെ പോയ സത്യങ്ങളാണ് അവ. അനില്‍ ആന്റണി കോണ്‍ഗ്രസിന്റെ സോഷ്യല്‍ മീഡിയ ഹെഡ് ആയിരുന്നിട്ടുകൂടി ഭാരത് ജോഡോ യാത്രയെപ്പറ്റി ഒരു വരി പോലും ട്വിറ്ററില്‍ കുറിച്ചിട്ടില്ലെന്നും വി പി സാനും പ്രതികരിച്ചു.
കശ്മീര്‍ ഇല്ലാത്ത ഇന്ത്യന്‍ ഭൂപടം പലതവണ പ്രസിദ്ധീകരിച്ച മാധ്യമമാണ് ബിബിസിയെന്നും ഇന്ത്യയുടെ പരമാധികാരത്തെ ചോദ്യം ചെയ്തുള്ള വാര്‍ത്തകള്‍ മുമ്പ് പലതവണ ബിബിസി നല്‍കിയിട്ടുണ്ടെന്നുമായിരുന്നു അനില്‍ കെ ആന്റണിയുടെ പരാമര്‍ശം. ഇന്ത്യയുടെ ആഭ്യന്തര സുരക്ഷയെ ചോദ്യം ചെയ്തു കൊണ്ട് ബിബിസി മുന്‍പ് ചെയ്ത വാര്‍ത്തകള്‍ പങ്കുവെച്ചായിരുന്നു അനിലിന്റെ ട്വീറ്റ്.
