ഫിഷിങ് ഹാര്‍ബര്‍ അടിമുടി മാറുകയാണ്. 18 കോടി രൂപയുടെ വികസനം യാഥാര്‍ഥ്യത്തിലേക്ക്. 4 പദ്ധതികള്‍ക്കു ടെന്‍ഡറായി. ചെറിയ കപ്പലുകള്‍ക്കു വരെ വന്നുപോകാന്‍ കഴിയുന്ന തരത്തില്‍ ആഴംകൂട്ടല്‍ നടപടികളും ഉടനുണ്ടാകും. ഹാര്‍ബര്‍ പ്രദേശത്ത് 3.5 മീറ്റര്‍ ആഴം ഉറപ്പാക്കാനാണു പദ്ധതി. വേലിയേറ്റ സമയത്ത് 4 മീറ്ററിലധികം ആഴം ലഭിക്കും. പദ്ധതിയുടെ സാങ്കേതികാനുമതി ലഭിച്ചു കഴിഞ്ഞാലുടന്‍ ടെന്‍ഡര്‍ നടപടികള്‍ ആരംഭിക്കും. വര്‍ഷങ്ങളായി മത്സ്യത്തൊഴിലാളികള്‍ പരാതിപ്പെട്ടു കൊണ്ടിരിക്കുന്ന മണല്‍തിട്ട ഭീഷണിക്ക് ഇതോടെ പരിഹാരമാകും.
ഹാര്‍ബറിന്റെ 2 ഭാഗങ്ങളിലായി നിര്‍മിച്ചിരിക്കുന്ന വാര്‍ഫുകള്‍ ബന്ധിപ്പിക്കുന്ന റോഡ് നിര്‍മാണം ഉടന്‍ തുടങ്ങും. ടെന്‍ഡര്‍ നടപടി പൂര്‍ത്തീകരിച്ചു കഴിഞ്ഞു. 41 ലക്ഷം രൂപയാണ് ഇതിനായി ചെലവഴിക്കുന്നത്. ഹാര്‍ബറിന്റെ 2 ഭാഗങ്ങളില്‍ മത്സ്യത്തൊഴിലാളികള്‍ക്കു വിശ്രമകേന്ദ്രം നിര്‍മിക്കുന്ന പദ്ധതിയുടെയും ടെന്‍ഡര്‍ പൂര്‍ത്തീകരിച്ചു. 61 ലക്ഷം രൂപയാണ് ഇതിനായി ചെലവഴിക്കുന്നത്. ബോട്ടുകളും വള്ളങ്ങളും തീരമടുക്കുന്നതു കാത്തിരിക്കുന്ന മത്സ്യത്തൊഴിലാളികള്‍ക്ക് ഇനി വെയിലു കൊള്ളാതെ സുരക്ഷിതമായ ഇടമൊരുങ്ങും.
വല നെയ്യുന്നതിനായി പുതിയ കേന്ദ്രം നിര്‍മിക്കും. നിലവിലുള്ള കേന്ദ്രം മതിയാകാതെ വന്നതോടെയാണു പുതിയ വലനെയ്ത്തുകേന്ദ്രം നിര്‍മിക്കാന്‍ പദ്ധതി തയാറാക്കിയിരിക്കുന്നത്. 1.25 കോടി രൂപയാണ് ഇതിനായി ചെലവഴിക്കുന്നത്. ടെന്‍ഡര്‍ നടപടികള്‍ പൂര്‍ത്തിയാക്കിക്കഴിഞ്ഞു. നിലവിലെ ലേല ഹാള്‍ നവീകരിക്കുന്നതിനും വിപുലമായ പദ്ധതിയുണ്ട്. ഹാര്‍ബറിലെ തൂണുകള്‍ പലതും ദ്രവിച്ചു തുടങ്ങിയിരിക്കുന്നു. ഇവ സ്റ്റീല്‍ കവറിങ് ചെയ്തു സംരക്ഷിക്കും.
