ഉത്തരാഖണ്ഡിലെ ചമോലി ജില്ലയിൽ തുരങ്ക നിർമാണത്തിനിടെ മണ്ണും വെള്ളവും കുത്തിയൊഴുകിയുണ്ടായ അപകടത്തിൽ ഏഴ് തൊഴിലാളികൾ മരിച്ചു. 15 പേർക്ക് പരിക്കേറ്റു. രണ്ട് തൊഴിലാളികൾ ഇപ്പോഴും തുരങ്കത്തിനുള്ളിൽ കുടുങ്ങിക്കിടക്കുന്നതായാണ് വിവരം. രക്ഷാപ്രവർത്തനം പുരോഗമിക്കുകയാണ്
ചമോലി ജില്ലയിലെ പിപൽക്കോട്ടിക്ക് സമീപമാണ് ദാരുണ അപകടം ഉണ്ടായത്. തുരങ്ക നിർമാണം നടക്കുന്നതിനിടെ വൈകുന്നേരം ആറരയോടെ വൻതോതിൽ മണ്ണും വെള്ളവും തുരങ്കത്തിനുള്ളിലേക്ക് ഇരച്ചുകയറുകയായിരുന്നു. അപകടസമയത്ത് 22 തൊഴിലാളികളാണ് തുരങ്കത്തിനുള്ളിൽ ഉണ്ടായിരുന്നത്.
പരിക്കേറ്റ 15 തൊഴിലാളികളെ ആശുപത്രിയിൽ പ്രവേശിപ്പിച്ചു. ഇവരുടെ ആരോഗ്യനില തൃപ്തികരമാണെന്ന് അധികൃതർ അറിയിച്ചു. അപകടത്തിൽപ്പെട്ട ജാർഖണ്ഡ്, ഛത്തീസ്ഗഢ് സ്വദേശികളുടെ വിവരങ്ങൾ അതത് സംസ്ഥാന മുഖ്യമന്ത്രിമാരെയും അറിയിച്ചിട്ടുണ്ട്.
കുടുങ്ങിക്കിടക്കുന്ന തൊഴിലാളികളെ കണ്ടെത്തുന്നതിനായി എൻഡിആർഎഫിന്റെയും എസ്ഡിആർഎഫിന്റെയും നേതൃത്വത്തിൽ രക്ഷാപ്രവർത്തനം തുടരുകയാണ്. രക്ഷാപ്രവർത്തനവും ദുരിതാശ്വാസ നടപടികളും വേഗത്തിലാക്കാൻ മുഖ്യമന്ത്രി പുഷ്കർ സിംഗ് ധാമി നിർദേശം നൽകി. മുതിർന്ന ഉദ്യോഗസ്ഥരിൽ നിന്ന് തത്സമയ വിവരങ്ങൾ ശേഖരിക്കുന്നുണ്ടെന്നും മുഖ്യമന്ത്രി അറിയിച്ചു.
കഴിഞ്ഞ ദിവസങ്ങളായി ചമോലി ജില്ലയിൽ ശക്തമായ മഴ തുടരുകയാണ്. തിങ്കളാഴ്ച നദിയിലെ ജലനിരപ്പ് ഉയർന്നതിനെ തുടർന്ന് നിതി താഴ്വരയിലെ ഒരു പാലവും ശക്തമായ ഒഴുക്കിൽ തകർന്നിരുന്നു. ചെളി കലർന്ന വെള്ളം ശക്തമായി ഒഴുകിയെത്തി ലോഹപ്പാലത്തിൽ ഇടിക്കുന്നതിന്റെയും നിമിഷങ്ങൾക്കകം പാലം ഒഴുക്കിൽപ്പെട്ട് മാറിപ്പോകുന്നതിന്റെയും ദൃശ്യങ്ങൾ പുറത്തുവന്നിരുന്നു.
