വീട്ടുമുറ്റത്ത് കളിച്ചുകൊണ്ടിരുന്ന അഞ്ചുവയസുകാരന് പുലിയുടെ ആക്രമണം

തൃശൂർ: വാൽപ്പാറ അപ്പർ പറളിയിൽ വീട്ടുമുറ്റത്ത് കളിച്ചുകൊണ്ടിരുന്ന അഞ്ചുവയസുകാരനെ പുലി ആക്രമിച്ചു. തോട്ടം തൊഴിലാളികളായ ഗുരുസ്വാമി–നാഗജ്യോതി ദമ്പതികളുടെ മകൻ ഭീഷിതനാണ് ആക്രമണത്തിനിരയായത്.

വ്യാഴാഴ്ച വൈകീട്ടായിരുന്നു സംഭവം. വീട്ടുമുറ്റത്ത് കളിച്ചുകൊണ്ടിരുന്ന കുട്ടിയെ പുലി പിടികൂടി 15 മീറ്ററോളം വലിച്ചിഴച്ചുകൊണ്ടുപോയി. കുട്ടിയെ പുലി ആക്രമിക്കുന്നത് കണ്ട അമ്മ നാഗജ്യോതി ബഹളംവെച്ചതോടെ സമീപത്തെ തോട്ടം തൊഴിലാളികൾ ഓടിയെത്തുകയായിരുന്നു.

തൊഴിലാളികൾ എത്തിയതോടെ പുലി കുട്ടിയെ ഉപേക്ഷിച്ച് കാട്ടിലേക്ക് കടന്നുകളഞ്ഞു. തലയ്ക്ക് പരുക്കേറ്റ കുട്ടിയെ കോയമ്പത്തൂർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

വാൽപ്പാറ മേഖലയിൽ പുലിയാക്രമണം പതിവാകുന്നതായി നാട്ടുകാർ പറയുന്നു. നിരവധി പേർ പുലിയുടെ ആക്രമണത്തിൽ നിന്ന് തലനാരിഴയ്ക്കാണ് രക്ഷപ്പെടുന്നതെന്നും പ്രദേശവാസികൾ വ്യക്തമാക്കി.