തിരുവോണം ബമ്പറിന് റെക്കോർഡ് വിൽപ്പന. അച്ചടിച്ച മുഴുവൻ ടിക്കറ്റുകളും വിറ്റുതീർന്ന ആദ്യ ലോട്ടറിയെന്ന റെക്കോർഡ് ഇത്തവണത്തെ ഓണം ബമ്പർ സ്വന്തമാക്കി. ഏറ്റവും കൂടുതൽ ടിക്കറ്റുകൾ വിറ്റത് പാലക്കാട് ജില്ലയിലാണ്. തൃശൂർ രണ്ടാം സ്ഥാനത്തും തിരുവനന്തപുരം മൂന്നാം സ്ഥാനത്തുമാണ്. ഏറ്റവും കുറവ് വിൽപ്പന നടന്നത് കാസർഗോഡ് ജില്ലയിലാണ്.
90 ലക്ഷം ടിക്കറ്റുകളാണ് ഇത്തവണത്തെ തിരുവോണം ബമ്പറിനായി അച്ചടിച്ചത്. നാളെ നറുക്കെടുപ്പ് നടക്കാനിരിക്കെയാണ് വിൽപ്പനയുടെ കണക്കുകൾ പുറത്തുവരുന്നത്. ഏറ്റവും ഉയർന്ന സമ്മാനത്തുകയും ഏറ്റവും കൂടുതൽ ടിക്കറ്റുകൾ അച്ചടിച്ചതും ഉൾപ്പെടെ നിരവധി പ്രത്യേകതകളാണ് ഈ വർഷത്തെ ഓണം ബമ്പറിനുള്ളത്.
2026ലെ തിരുവോണം ബമ്പറിന്റെ ഒന്നാം സമ്മാനം 30 കോടി രൂപയാണ്. രണ്ടാം സമ്മാനമായി ഒരു കോടി രൂപ വീതം 20 പേർക്ക് ലഭിക്കും. മൂന്നാം സമ്മാനമായി 25 ലക്ഷം രൂപ വീതം 20 പേർക്കും നാലാം സമ്മാനമായി അഞ്ച് ലക്ഷം രൂപ വീതം 10 പേർക്കും ലഭിക്കും. അഞ്ചാം സമ്മാനം രണ്ട് ലക്ഷം രൂപ വീതം 10 പേർക്കാണ്.
ഇതിന് പുറമെ 5,000, 2,000, 1,000, 500 രൂപയുടെ നിരവധി സമ്മാനങ്ങളുമുണ്ട്. ടിക്കറ്റ് വില 500 രൂപയാണ്.
ലോട്ടറി വകുപ്പിൽ നിന്നും ഹോൾസെയിൽ ഏജന്റുമാരിൽ നിന്നും ചില്ലറ വിൽപ്പനക്കാർ വാങ്ങിയ ബാക്കിയുള്ള ടിക്കറ്റുകളും ഇന്നും നാളെയുമായി പൂർണമായി വിറ്റഴിയുമെന്നാണ് കണക്കാക്കുന്നത്.
90 ലക്ഷം ടിക്കറ്റുകളിൽ ഏറ്റവും കൂടുതൽ വിറ്റുപോയത് പാലക്കാട് ജില്ലയിലാണ്. 20 ലക്ഷം ടിക്കറ്റുകളാണ് പാലക്കാട് ജില്ലയിൽ മാത്രം വിറ്റഴിച്ചത്.
