ഇടുക്കി: കട്ടപ്പന കടമാക്കുഴിയിൽ ഏലത്തോട്ടത്തിൽ പാറയിടിഞ്ഞ് വീണ് ഒരാൾ മരിച്ചു. തോട്ടം ഉടമ ബെന്നി പുരയിടത്തിലാണ് മരിച്ചത്.
രാവിലെ ഭാര്യയ്‌ക്കൊപ്പം ഏലത്തോട്ടത്തിൽ ജോലിക്കെത്തിയതായിരുന്നു ബെന്നി. ഇതിനിടെ മലമുകളിൽ നിന്ന് വലിയ പാറക്കൂട്ടം അടർന്നുവീഴുകയായിരുന്നു. പാറ താഴേക്ക് പതിക്കുന്നത് കണ്ട് ഓടിമാറാൻ ശ്രമിച്ചെങ്കിലും ബെന്നിക്ക് രക്ഷപ്പെടാനായില്ല.
ഏറെ ശ്രമകരമായാണ് ബെന്നിയെ പാറക്കൂട്ടത്തിനടിയിൽ നിന്ന് പുറത്തെടുത്തത്. മുൻപ് ഉരുൾപൊട്ടൽ ഉണ്ടായ മേഖലയാണിത്.
അപകടത്തെത്തുടർന്ന് സ്ഥലത്തേക്കുള്ള ആളുകളുടെ പ്രവേശനം പൊലീസ് നിയന്ത്രിച്ചു. പ്രദേശത്ത് ഇനിയും പാറയിടിയാൻ സാധ്യതയുണ്ടെന്നും പൊലീസ് മുന്നറിയിപ്പ് നൽകിയിട്ടുണ്ട്.
