തിരുവനന്തപുരം: ഓപ്പറേഷൻ തൂഫാന്റെ ഭാഗമായി എം.ഡി.എം.എ, ഹാഷിഷ് ഓയിൽ, കഞ്ചാവ് എന്നിവ പിടികൂടിയ കേസിൽ ഒരാൾ കൂടി അറസ്റ്റിൽ. കുളത്തൂർ കിഴക്കുംകര സ്വദേശി ആർ.എൽ. ആകാശിനെയാണ് കോവളം പൊലീസ് പിടികൂടിയത്. 26 വയസ്സാണ്.
ലഹരിവസ്തുക്കളുടെ സാമ്പത്തിക ഇടപാടുകൾ ആകാശിന്റെ ബാങ്ക് അക്കൗണ്ട് വഴിയാണ് നടത്തിയിരുന്നതെന്നാണ് പൊലീസ് പറയുന്നത്. മൊബൈൽ ഫോൺ പരിശോധിച്ചതിൽ എം.ഡി.എം.എ വിൽപ്പനയുമായി ബന്ധപ്പെട്ട നിരവധി ചിത്രങ്ങളും കണ്ടെത്തി.
നഗരത്തിലെ ലഹരിവിൽപ്പനയിലെ പ്രധാന കണ്ണികളിലൊരാളാണ് ആകാശെന്നാണ് പൊലീസ് പറയുന്നത്. ലഹരിക്കടത്തിലൂടെ സമ്പാദിച്ച സ്വത്തുക്കൾ കണ്ടെത്തുന്നതിനുള്ള നടപടികൾ സ്വീകരിക്കുമെന്നും കോവളം പൊലീസ് അറിയിച്ചു.
കേസിൽ ജൂൺ 30നാണ് തുമ്പ കരിമണൽ സ്വദേശി സച്ചുവിനെയും പാങ്ങപ്പാറ സ്വദേശി അഖിൽ കൃഷ്ണയെയും അറസ്റ്റ് ചെയ്തത്. ഇവരിൽ നിന്ന് 120 ഗ്രാമിലധികം എം.ഡി.എം.എ, 4.11 ഗ്രാം ഹാഷിഷ് ഓയിൽ, 200 ഗ്രാം കഞ്ചാവ് എന്നിവ പിടിച്ചെടുത്തിരുന്നു.
ബെംഗളൂരുവിൽ നിന്ന് ഒന്നരലക്ഷം രൂപയ്ക്ക് ലഹരിവസ്തുക്കൾ വാങ്ങി തമിഴ്നാട് വഴി തിരുവനന്തപുരത്തേക്ക് എത്തിക്കുന്നതിനിടെയാണ് ഇരുവരും പിടിയിലായത്.
സച്ചുവിനും സഹോദരൻ സഞ്ജുവിനുമെതിരെ നേരത്തെയും ലഹരിക്കേസുകൾ രജിസ്റ്റർ ചെയ്തിട്ടുണ്ടെന്ന് പൊലീസ് അറിയിച്ചു.
അറസ്റ്റിലായ ആകാശിനെ കോടതിയിൽ ഹാജരാക്കി റിമാൻഡ് ചെയ്തു. കേസിൽ കൂടുതൽ അന്വേഷണം തുടരുകയാണ്.
