മലപ്പുറം: സ്ത്രീത്വത്തെ അപമാനിച്ചെന്ന കേസിൽ അറസ്റ്റിലായ യൂട്യൂബർ മമ്മു എന്ന മുഹമ്മദ് മമ്മുവിനെ കസ്റ്റഡിയിൽ വാങ്ങാൻ പൊലീസ് കോടതിയെ സമീപിക്കും. പ്രതിയെ മൂന്ന് ദിവസത്തെ കസ്റ്റഡിയിൽ വേണമെന്നാവശ്യപ്പെട്ട് മഞ്ചേരി പൊലീസ് മഞ്ചേരി സിജെഎം കോടതിയിൽ അപേക്ഷ നൽകും. കേസുമായി ബന്ധപ്പെട്ട് കൂടുതൽ ചോദ്യം ചെയ്യലിനും അന്വേഷണ പുരോഗതിക്കുമായി പ്രതിയെ കസ്റ്റഡിയിൽ വേണമെന്നാണ് പൊലീസിന്റെ ആവശ്യം.
അതേസമയം, മഞ്ചേരി പൊലീസ് രജിസ്റ്റർ ചെയ്ത കേസിലെ ഒന്നാം പ്രതിയായ യൂട്യൂബർ തൊപ്പി എന്ന നിഹാദ് ഇപ്പോഴും ഒളിവിലാണ്. ആലുവ റൂറൽ പൊലീസ് രജിസ്റ്റർ ചെയ്ത മറ്റൊരു കേസിൽ തൊപ്പി മുൻകൂർ ജാമ്യം തേടിയിട്ടുണ്ടെങ്കിലും മഞ്ചേരി കേസിൽ ഇതുവരെ കോടതിയെ സമീപിച്ചിട്ടില്ലെന്നാണ് പൊലീസ് പറയുന്നത്.
മമ്മുവിനും നിഹാദിനും പുറമെ ജാസി, ഷമീം തുടങ്ങിയവരാണ് മഞ്ചേരി കേസിലെ മറ്റ് പ്രതികൾ. മലപ്പുറത്തെ ഒരു യുവഗായകന്റെ സുഹൃത്തിന്റെ ഭാര്യയ്ക്കെതിരെ ലൈവ് സ്ട്രീമിങ്ങിലൂടെ അശ്ലീല പരാമർശങ്ങൾ നടത്തിയെന്ന പരാതിയിലാണ് പൊലീസ് കേസ് രജിസ്റ്റർ ചെയ്തത്.
കഴിഞ്ഞ ചൊവ്വാഴ്ചയാണ് മമ്മുവിനെ പൊലീസ് അറസ്റ്റ് ചെയ്തത്. നേരത്തെ തൊപ്പിയും മമ്മുവും ഉൾപ്പെടെയുള്ളവർ ‘എംആർഇസഡ് ഗ്യാങ്’ എന്ന പേരിൽ ഒരുമിച്ച് ലൈവ് സ്ട്രീമിങ്ങുകളും വ്ലോഗുകളും നടത്തിയിരുന്നു. പിന്നീട് സംഘത്തിൽ അഭിപ്രായവ്യത്യാസങ്ങളുണ്ടാകുകയും ഇരുവിഭാഗങ്ങളും സമൂഹമാധ്യമങ്ങളിലൂടെ പരസ്പരം ആരോപണങ്ങളുമായി രംഗത്തെത്തുകയും ചെയ്തു.
ഈ ലൈവ് സ്ട്രീമിങ്ങുകൾക്കിടെയാണ് മലപ്പുറത്തെ യുവഗായകന്റെ സുഹൃത്തിന്റെ ഭാര്യയ്ക്കെതിരെ മോശം പരാമർശങ്ങൾ നടത്തിയതെന്നാണ് പരാതി. വിവാദമായ വീഡിയോ പിന്നീട് യൂട്യൂബിൽ നിന്ന് നീക്കം ചെയ്തിരുന്നു. ഇതിനുപിന്നാലെ തൊപ്പിയുടെ യൂട്യൂബ് ചാനലും നീക്കം ചെയ്യപ്പെട്ടു.
കേസിൽ കൂടുതൽ തെളിവുകൾ ശേഖരിക്കുന്നതിനും മറ്റ് പ്രതികളുടെ പങ്ക് പരിശോധിക്കുന്നതിനുമായി പൊലീസ് അന്വേഷണം തുടരുകയാണ്.
