കൊച്ചി ചേരാനല്ലൂരിൽ പതിനേഴുകാരൻ ഓടിച്ച ബെൻസ് കാറിടിച്ച് സ്കൂട്ടർ യാത്രക്കാരൻ മരിച്ച സംഭവത്തിൽ കൂടുതൽ വിവരങ്ങൾ പുറത്ത്. തട്ടുകട ഉടമയും മാഞ്ഞാലി സ്വദേശിയുമായ ജയപാലകൃഷ്ണനാണ് മരിച്ചത്. അപകടമുണ്ടാക്കിയ കാർ ഓടിച്ചിരുന്നത് ഒരു ജഡ്ജിയുടെ മകനാണെന്ന് പൊലീസ് അറിയിച്ചു.
പുലർച്ചെ മൂന്നുമണിയോടെയായിരുന്നു അപകടം. ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന ജയപാലകൃഷ്ണന്റെ സ്കൂട്ടറിന് പിന്നിൽ അമിതവേഗത്തിലെത്തിയ കാർ ഇടിക്കുകയായിരുന്നു. അപകടത്തിന് പിന്നാലെ വാഹനം നിർത്താതെ പോകാൻ പതിനേഴുകാരൻ ശ്രമിച്ചെന്നാണ് ബന്ധുക്കളുടെ ആരോപണം. സംഭവത്തിൽ പതിനേഴുകാരനെയും കാറും പൊലീസ് കസ്റ്റഡിയിലെടുത്തു.
അതേസമയം, പ്രതിക്കെതിരെ ചുമത്തിയ വകുപ്പുകളെക്കുറിച്ച് ബന്ധുക്കൾ ആശങ്ക പ്രകടിപ്പിച്ചു. മനപ്പൂർവമല്ലാത്ത നരഹത്യയ്ക്ക് കേസെടുക്കുമെന്ന് ചേരാനല്ലൂർ സി.ഐ ശ്യാംകുമാർ വ്യക്തമാക്കി. പ്രതി മദ്യപിച്ചിട്ടില്ലെന്നും മറ്റ് ലഹരിവസ്തുക്കൾ ഉപയോഗിച്ചിട്ടുണ്ടോയെന്ന് പരിശോധിക്കുമെന്നും പൊലീസ് അറിയിച്ചു. ജുവനൈൽ ജസ്റ്റിസ് ബോർഡിന്റെ അനുമതിക്ക് ശേഷമായിരിക്കും പ്രതിയെ കോടതിയിൽ ഹാജരാക്കുക. സംഭവത്തിൽ വിശദമായ അന്വേഷണം തുടരുകയാണ്.
