മലപ്പുറം: പത്തനംതിട്ട മുന്‍ എസ്പി സുജിത്ത് ദാസിനെതിരെ രൂക്ഷമായ വിമര്‍ശനവുമായി എം എസ് എഫ് സംസ്ഥാന പ്രസിഡന്റ് പികെ നവാസ്. സ്വര്‍ണ്ണകടത്തുമായി ബന്ധപ്പെട്ട് പി വി അന്‍വറിന്റെ വെളിപ്പെടുത്തലിന് പിന്നാലെയാണ് വിമര്‍ശനവുമായി പി കെ നവാസ് രംഗത്ത് എത്തിയത്. സുജിത്ത് ദാസ് നെഞ്ചില്‍ കുത്തി നടക്കുന്ന മെഡലുകള്‍ തിരികെ വാങ്ങണമെന്നാണ് പികെ നവാസ് പറയുന്നത്. മലപ്പുറം ജില്ലയെ ചതിച്ച് നേടിയതാണ് ഈ മെഡലുകളെന്നും പോസ്റ്റില്‍ വെളിപ്പെടുത്തുന്നുണ്ട്.
ഇന്ത്യയ്ക്ക് അഭിമാനമായ മലപ്പുറം ജില്ലയിലെ ജനങ്ങള്‍ക്ക് മേല്‍ ക്രിമിനല്‍ ചാപ്പ കുത്തി നാണക്കേട് ഉണ്ടാക്കി താങ്കള്‍ നേടിയ ഈ മെഡലുകള്‍ അഴിച്ച് വെക്കണം. ഇത് സംബന്ധിച്ച് ഡിജിപിക്കും സര്‍ക്കാരിലും പരാതി നല്‍കിയിട്ടുണ്ടെന്നും പോസ്റ്റില്‍ വ്യക്തമാക്കുന്നുണ്ട്. ഫേസ്ബുക്ക് പോസ്റ്റിലൂടെയായിരുന്നു പി കെ നവാസിന്റെ വെളിപ്പെടുത്തല്‍.
