തൃശൂർ: ഓപ്പറേഷൻ തൂഫാന്റെ ഭാഗമായി നടത്തിയ പരിശോധനയിൽ എംഡിഎംഎയും കഞ്ചാവുമായി സഹോദരങ്ങൾ അറസ്റ്റിൽ. ഒളരി അരണാട്ടുകര സ്വദേശികളായ അത്താണിക്കൽ വീട്ടിൽ ജിത്ത് (29), ജീവ (32) എന്നിവരെയാണ് അന്തിക്കാട് മഞ്ഞപ്പിത്തം ഭാഗത്തെ വാടകവീട്ടിൽനിന്ന് പൊലീസ് പിടികൂടിയത്.
പ്രതികൾ താമസിച്ചിരുന്ന മുറികളിൽ നടത്തിയ പരിശോധനയിൽ 0.950 ഗ്രാം എംഡിഎംഎയും 42.760 ഗ്രാം കഞ്ചാവും കണ്ടെടുത്തു. മയക്കുമരുന്ന് വിൽപ്പനയ്ക്കും അളവെടുക്കുന്നതിനും ഉപയോഗിച്ചിരുന്ന രണ്ട് ഡിജിറ്റൽ ത്രാസുകൾ, സിപ്പ് ലോക്ക് കവറുകൾ, ഒസിബി പേപ്പറുകൾ, എംഡിഎംഎ ഉപയോഗിക്കുന്നതിനുള്ള ഉപകരണം, വിൽപ്പനയിലൂടെ ലഭിച്ചതെന്ന് കരുതുന്ന 10,800 രൂപ എന്നിവയും പൊലീസ് പിടിച്ചെടുത്തു.
ജിത്തിനെതിരെ തൃശൂർ ഈസ്റ്റ്, വെസ്റ്റ്, ചെറുതുരുത്തി പൊലീസ് സ്റ്റേഷൻ പരിധികളിലായി മയക്കുമരുന്ന് വിൽപ്പന, ലഹരി ഉപയോഗം, ലഹരിയിൽ വാഹനമോടിക്കൽ തുടങ്ങിയ അഞ്ച് കേസുകളുണ്ടെന്നാണ് പൊലീസ് അറിയിച്ചത്. ജീവയ്ക്കെതിരെയും ഒറ്റപ്പാലം പൊലീസ് സ്റ്റേഷൻ പരിധിയിൽ മയക്കുമരുന്ന് വിൽപ്പനയ്ക്കായി സൂക്ഷിച്ച കേസുണ്ട്.
കാട്ടൂർ, അന്തിക്കാട് പൊലീസ് ഉദ്യോഗസ്ഥരും ഡാൻസാഫ്, ഷാഡോ പൊലീസ് സംഘങ്ങളും സംയുക്തമായാണ് പരിശോധന നടത്തി പ്രതികളെ പിടികൂടിയത്. സംഭവത്തിൽ കൂടുതൽ അന്വേഷണം തുടരുകയാണ്.
