ആലപ്പുഴ: ഹരിപ്പാട്ടിൽ പോഷകാഹാരക്കുറവിനെ തുടർന്ന് രണ്ടര വയസ്സുകാരൻ മരിച്ച സംഭവത്തിൽ തുടർനടപടികൾ പ്രതിസന്ധിയിൽ. ദമ്പതികളുടെ നവജാത ശിശുവിനെ ശിശുക്ഷേമ സമിതിക്ക് വിട്ടുനൽകില്ലെന്ന മാതാവ് താരയുടെ നിലപാടാണ് പ്രതിസന്ധിക്ക് കാരണം.
രാജേഷ്–താര ദമ്പതികളുടെ രണ്ട് കുട്ടികൾ മരിക്കുകയും മറ്റു കുട്ടികളുടെ പരിചരണത്തിൽ വീഴ്ചയുണ്ടെന്ന് കണ്ടെത്തുകയും ചെയ്തതോടെയാണ് നവജാത ശിശുവിനെ ഏറ്റെടുക്കാൻ ജില്ലാ ശിശുക്ഷേമ സമിതി തീരുമാനിച്ചത്. എന്നാൽ, കുട്ടിയെ വിട്ടുനൽകാൻ മാതാവ് സമ്മതിച്ചിട്ടില്ല. കുട്ടിയുമായി വീട്ടിലേക്ക് മടങ്ങണമെന്നാണ് താരയുടെ ആവശ്യം.
ഇന്നലെ താരയുമായി ശിശുക്ഷേമ സമിതി അധികൃതർ സംസാരിച്ചെങ്കിലും അനുകൂല നിലപാടുണ്ടായില്ല. ജില്ലാ ചൈൽഡ് പ്രൊട്ടക്ഷൻ ഓഫീസറുടെ സാമൂഹിക അന്വേഷണ റിപ്പോർട്ടിന്റെ അടിസ്ഥാനത്തിൽ ഇടക്കാല ഉത്തരവിലൂടെ കുട്ടിയെ ഏറ്റെടുക്കാനുള്ള സാധ്യതയാണ് സമിതി പരിശോധിക്കുന്നത്.
രണ്ടര വയസ്സുകാരന്റെ മരണവിവരം ഇന്നലെയാണ് മാതാവിനെ അറിയിച്ചത്. അതേസമയം, താരയ്ക്ക് ഉടൻ കൗൺസിലിങ് നൽകുമെന്ന് വണ്ടാനം മെഡിക്കൽ കോളേജ് അധികൃതർ അറിയിച്ചു.
