കോഴിക്കോട്: താമരശ്ശേരിയിൽ വീടുകൾക്ക് സമീപം നഗ്നനായി എത്തി ശല്യമുണ്ടാക്കുന്ന അജ്ഞാതന്റെ സാന്നിധ്യം വീണ്ടും സ്ഥിരീകരിച്ചു. താമരശ്ശേരി പൊലീസ് സ്റ്റേഷന് സമീപത്തെ ഒതയോത്ത് ഭാഗത്താണ് സംഭവം. നേരത്തെയും സമാനമായ സംഭവങ്ങൾ ഉണ്ടായ പ്രദേശത്ത് വീണ്ടും യുവാവ് എത്തിയതോടെ നാട്ടുകാർ ആശങ്കയിലാണ്.
ഇന്നലെ പുലർച്ചെ വീടുകളുടെ പിൻഭാഗത്ത് നഗ്നനായി എത്തിയ യുവാവ് ജനലിലൂടെ അകത്തേക്ക് നോക്കുന്നതിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. മുമ്പ് സമാന സംഭവങ്ങളുടെ ദൃശ്യങ്ങൾ സഹിതം നാട്ടുകാർ പൊലീസിൽ പരാതി നൽകിയിരുന്നെങ്കിലും പ്രതിയെ കണ്ടെത്താനായിട്ടില്ലെന്നാണ് നാട്ടുകാരുടെ ആരോപണം.
പൊലീസ് സ്റ്റേഷനിൽ നിന്ന് ഏകദേശം 50 മീറ്റർ മാത്രം അകലെയുള്ള പ്രദേശത്താണ് സംഭവങ്ങൾ ആവർത്തിക്കുന്നത്. രാത്രികാലങ്ങളിൽ വീടുകൾക്ക് സമീപം എത്തി ശല്യമുണ്ടാക്കുന്നയാളെ കണ്ടെത്തി നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
