കോഴിക്കോട്: ഗതാഗത നിയമങ്ങള് നഗ്നമായി ലംഘിച്ച് സ്വന്തം ജീവനും മറ്റുള്ളവരുടെ ജീവനും അപകടത്തിലാക്കുന്നവര്ക്കെതിരെ കര്ശന നടപടി സ്വീകരിക്കണമെന്ന് മനുഷ്യാവകാശ കമ്മീഷന്. മനുഷ്യാവകാശ കമ്മീഷന് ജുഡീഷ്യല് അംഗം കെ.ബൈജുനാഥ് സംസ്ഥാന പൊലീസ് മേധാവിക്ക് ഇതുമായി ബന്ധപ്പെട്ട നിര്ദ്ദേശം നല്കി. റീല്സ് ചിത്രീകരിക്കുന്നതിനിടയില് വീഡിയോഗ്രാഫര് ബീച്ച് റോഡില് കാറിടിച്ച് മരിച്ച സംഭവത്തിന്റെ പശ്ചാത്തലത്തിലാണ് നിര്ദ്ദേശം.
സംസ്ഥാന പൊലീസ് മേധാവി സ്വീകരിച്ച നടപടികളെ കുറിച്ച് 4 ആഴ്ച്ചക്കകം റിപ്പോര്ട്ട് സമര്പ്പിക്കണമെന്നും കമ്മീഷന് നിര്ദ്ദേശം നല്കിയിട്ടുണ്ട്. കോഴിക്കോട് ബീച്ചില് യുവാവ് മരിക്കാനിടയായ സംഭവത്തിന്റെ വിശദാംശങ്ങള് പരിശോധിച്ച് വിശദമായ അന്വേഷണം നടത്തി 4 ആഴ്ചക്കകം കോഴിക്കോട് പൊലീസ് കമ്മീഷണര് റിപ്പോര്ട്ട് സമര്പ്പിക്കണമെന്നും കമ്മീഷന് നിര്ദ്ദേശിച്ചു. കോഴിക്കോട് ഗവ.ഗസ്റ്റ് ഹൗസില് ജനുവരി 30 ന് രാവിലെ 10.30 ന് നടക്കുന്ന സിറ്റിംഗില് കേസ് പരിഗണിക്കും.
ഇത്തരം സംഭവങ്ങള് മത്സര ഓട്ടത്തില് ഏര്പ്പെടുന്നവര്ക്ക് പുറമേ മറ്റ് വാഹനങ്ങള് ഓടിക്കുന്നവര്ക്കും കാല്നട യാത്രക്കാര്ക്കും ഭീഷണിയാണെന്ന് ഉത്തരവില് പറഞ്ഞു. സമൂഹ മാധ്യമത്തില് ജനപ്രീതിയുണ്ടാക്കാന് അപകടകരമായ നിലയില് റീലുകള് ചിത്രീകരിക്കുന്ന പ്രവണത വര്ധിച്ചുവരികയാണെന്ന് കമ്മീഷന് ചൂണ്ടിക്കാട്ടി. ഇത്തരം ചിത്രീകരണങ്ങള്ക്കായി ഗതാഗത നിയമങ്ങള് കാറ്റില് പറത്തി അപകടരമായി വാഹനം ഓടിക്കുന്നത് പതിവ് സംഭവമായി മാറിയിരിക്കുന്നു. പൊതുനിരത്തുകളെ മത്സര ഓട്ടങ്ങള്ക്കായുള്ള മൈതാനമായി മാറ്റുന്നവര്ക്കെതിരെ കര്ശന നടപടി സ്വീകരിക്കണമെന്നും കെ.ബൈജുനാഥ് സംസ്ഥാന പൊലീസ് മേധാവിക്ക് നിര്ദ്ദേശം നല്കി. പത്രവാര്ത്തകളുടെ അടിസ്ഥാനത്തില് അഡ്വ.വി.ദേവദാസ് സമര്പ്പിച്ച പരാതിയിലാണ് ഇടപെടല്.
