തിരുവനന്തപുരം: പുതിയ ബാറുകൾക്ക് ലൈസൻസ് നൽകിയതുമായി ബന്ധപ്പെട്ട വിവാദങ്ങളിൽ വിശദീകരണവുമായി എക്സൈസ് കമ്മീഷണർ സീറാം സാംബശിവറാവു രംഗത്ത്. നിയമവിരുദ്ധമായി യാതൊരു കാര്യവും ചെയ്തിട്ടില്ലെന്നും, ഈ വിഷയത്തിൽ മന്ത്രി രേഖാമൂലം വിശദീകരണം ആവശ്യപ്പെട്ടിട്ടില്ലെന്നും അദ്ദേഹം ‘ട്വന്റിഫോറിനോട്’ സ്ഥിരീകരിച്ചു. എക്സൈസ് മന്ത്രിക്ക് സംഭവത്തിന്റെ വിശദമായ റിപ്പോർട്ട് ഉടൻ കൈമാറുമെന്നും അദ്ദേഹം വ്യക്തമാക്കി.
ഫയലുകൾ വേഗത്തിൽ തീർപ്പാക്കുന്ന സ്വഭാവക്കാരനാണ് താനെന്നും സദ്ഭരണമാണ് തന്റെ മുഖ്യ ലക്ഷ്യമെന്നും സീറാം സാംബശിവറാവു പറഞ്ഞു. ജനങ്ങൾക്ക് വേണ്ടി പ്രവർത്തിക്കുമ്പോൾ ആരോപണങ്ങൾ നേരിടേണ്ടി വരാമെന്നും അദ്ദേഹം കൂട്ടിച്ചേർത്തു.
മന്ത്രിയുമായി യാതൊരുവിധ പ്രശ്നങ്ങളുമില്ലെന്നും മാധ്യമ വാർത്തകൾ പൂർണ്ണമായും അടിസ്ഥാനരഹിതമാണെന്നും അദ്ദേഹം വ്യക്തമാക്കി. ഫയലുകൾ നീക്കുന്നതിൽ അനാവശ്യ വേഗം കാണിച്ചിട്ടില്ലെന്നും കൂട്ടിച്ചേർത്തു. നിയമത്തിൽ പൂർണ്ണമായി വിശ്വസിക്കുന്ന ആളാണ് താനെന്നും, നിലവിലുള്ള നിയമങ്ങൾക്ക് അനുസൃതമായി മാത്രമാണ് കാര്യങ്ങൾ ചെയ്തതെന്നും അദ്ദേഹം ആവർത്തിച്ചു.
തനിക്കെതിരെ അനാവശ്യമായ വാർത്തകൾ പ്രചരിപ്പിച്ച് വേട്ടയാടാൻ ശ്രമങ്ങൾ നടക്കുന്നുണ്ടെന്നും, എക്സൈസ് മന്ത്രിക്ക് വിഷയം സംബന്ധിച്ച സമഗ്രമായ റിപ്പോർട്ട് ഉടൻ തന്നെ സമർപ്പിക്കുമെന്നും എക്സൈസ് കമ്മീഷണർ സീറാം സാംബശിവറാവു വ്യക്തമാക്കി.
