കോഴിക്കോട്: പന്തീരാങ്കാവ് ടോൾ പ്ലാസയിൽ സ്വന്തം ക്യുആർ കോഡ് ഉപയോഗിച്ച് യാത്രക്കാരിൽ നിന്ന് പണം തട്ടിയ കേസിൽ ഒരാൾ അറസ്റ്റിൽ. മധ്യപ്രദേശ് സ്വദേശി നവീൻ സിംഗ് ബധോരിയയെയാണ് പൊലീസ് പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. സംഭവത്തിൽ ആറുപേർക്കെതിരെ പൊലീസ് കേസെടുത്തിട്ടുണ്ട്.
ഒരുമാസത്തിനിടെ ഏഴ് ലക്ഷം രൂപ സംഘം തട്ടിയെടുത്തതായാണ് കണ്ടെത്തൽ. ഫാസ്റ്റ് ടാഗ് ഇല്ലാത്ത വാഹനങ്ങൾ ടോൾ പ്ലാസയിലൂടെ കടന്നുപോകുമ്പോൾ ജീവനക്കാർ സ്വന്തം ക്യുആർ കോഡ് സ്കാനർ കാണിച്ച് യാത്രക്കാരിൽ നിന്ന് പണം സ്വീകരിക്കുകയായിരുന്നു. ഈ പണം ടോൾ കമ്പനിയുടെ അക്കൗണ്ടിൽ എത്താതെ പ്രതികളുടെ സ്വകാര്യ അക്കൗണ്ടുകളിലേക്കാണ് മാറ്റിയിരുന്നത്.
ടോൾ പ്ലാസ മാനേജർ നടത്തിയ പരിശോധനയിലാണ് തട്ടിപ്പ് പുറത്തുവന്നത്. ലഭിച്ച പണം പ്രതികൾ പരസ്പരം വീതിച്ചെടുക്കുകയായിരുന്നുവെന്നാണ് പൊലീസിന്റെ പ്രാഥമിക കണ്ടെത്തൽ.
ടോൾ കമ്പനി മാനേജരുടെ പരാതിയിലാണ് നടപടി. സംഭവത്തിൽ കൂടുതൽ പേർക്ക് പങ്കുണ്ടോയെന്നും പണം എങ്ങനെയാണ് കൈമാറ്റം ചെയ്തതെന്നും കണ്ടെത്താൻ പൊലീസ് വിശദമായ അന്വേഷണം ആരംഭിച്ചു.
