പ്രായപൂർത്തിയാകാത്ത കുട്ടിക്കെതിരെ ലൈംഗികാതിക്രമം നടത്തിയ കേസിൽ യുവാവിന് ആറ് വർഷവും രണ്ട് മാസവും തടവും 35,500 രൂപ പിഴയും ശിക്ഷ. മേപ്പാടി മൂപ്പൈനാട് കടച്ചിക്കുന്ന് സ്വദേശി വി.എം. ബോവാസിനെയാണ് കൽപ്പറ്റ ഫാസ്റ്റ് ട്രാക്ക് സ്പെഷ്യൽ കോടതി ശിക്ഷിച്ചത്. 2022-ൽ മേപ്പാടി പോലീസ് രജിസ്റ്റർ ചെയ്ത കേസിലാണ് വിധി.
ഫോണിലൂടെയും നേരിട്ടും കുട്ടിയെ നിരന്തരം പിന്തുടർന്ന് ശല്യം ചെയ്യുകയും വീട്ടിൽ അതിക്രമിച്ചുകയറി കൈയിൽ പിടിച്ച് ലൈംഗികാതിക്രമം നടത്തുകയും ചെയ്തെന്നാണ് കേസ്. അന്നത്തെ മേപ്പാടി എസ്.ഐ വി.പി. സിറാജാണ് കേസ് അന്വേഷിച്ച് കുറ്റപത്രം സമർപ്പിച്ചത്. സ്പെഷ്യൽ പബ്ലിക് പ്രോസിക്യൂട്ടർ ജി. ബബിത പ്രോസിക്യൂഷനുവേണ്ടി ഹാജരായി.
