കാലടി ശ്രീശങ്കരാചാര്യ സംസ്കൃത സർവകലാശാലയിലെ വിദ്യാർഥി സമരത്തിന് പിന്തുണയുമായി മുൻ വൈസ് ചാൻസലർമാരും പ്രോ വൈസ് ചാൻസലർമാരും. സസ്പെൻഷനിലായ 16 വിദ്യാർഥികളെ സെമസ്റ്റർ പരീക്ഷ എഴുതാൻ അനുവദിക്കണമെന്നും സമരവുമായി ബന്ധപ്പെട്ട മറ്റ് വിഷയങ്ങൾ ചർച്ചയിലൂടെ പരിഹരിക്കണമെന്നും സംയുക്ത പ്രസ്താവനയിൽ ആവശ്യപ്പെട്ടു. സസ്പെൻഷനിലായ വിദ്യാർഥികൾക്ക് പരീക്ഷ എഴുതാൻ അവസരം നൽകണമെന്ന് കേരള ഹൈക്കോടതിയും നിർദേശിച്ചിരുന്നു. വിദ്യാർഥികളുടെ ഭാവി പരിഗണിച്ച് സർവകലാശാല നടപടി സ്വീകരിക്കണമെന്നാണ് മുൻ അക്കാദമിക് മേധാവികളുടെ ആവശ്യം.
അതേസമയം, സർവകലാശാലയിൽ അധ്യാപകർക്കെതിരെയും പ്രതികാര നടപടിയെന്ന ആരോപണം ഉയരുന്നു. ഇടത് അധ്യാപക സംഘടനയുടെ മുൻ ജനറൽ സെക്രട്ടറി ബിജു വിൻസെന്റിന് ടാറ്റ ഇൻസ്റ്റിറ്റ്യൂട്ട് ഓഫ് സോഷ്യൽ സയൻസസിൽ നടക്കുന്ന കോൺഫറൻസിൽ പങ്കെടുക്കാനുള്ള അനുമതി നിഷേധിച്ചതായാണ് പരാതി. ഇടത് അധ്യാപക സംഘടനാ നേതാക്കളുടെ അക്കാദമിക യാത്രകൾ തടസ്സപ്പെടുത്തുന്നുവെന്നും ആരോപണമുണ്ട്.
