കോഴിക്കോട് ജോലി ചെയ്തിരുന്ന സ്വർണാഭരണ നിർമാണശാലയിൽ നിന്ന് 44 പവൻ സ്വർണവുമായി കടന്നുകളഞ്ഞ അതിഥി തൊഴിലാളി അറസ്റ്റിൽ.
ബംഗാൾ സ്വദേശി സമീറിനെയാണ് പൊലീസ് അറസ്റ്റ് ചെയ്തത്. ഇയാളുടെ നാട്ടിലെത്തിയാണ് പൊലീസ് സംഘം പ്രതിയെ പിടികൂടിയത്.
കോഴിക്കോട് ഒളവണ്ണ ഒടുമ്പ്രയിൽ പ്രവർത്തിക്കുന്ന വി ഗോൾഡ് എന്ന സ്വർണാഭരണ നിർമാണശാലയിലെ ജീവനക്കാരനായിരുന്നു സമീർ.
കഴിഞ്ഞ 25-ാം തീയതിയാണ് സ്ഥാപനത്തിൽ മോഷണം നടന്നത്. ആഭരണങ്ങൾ നിർമിക്കുന്നതിനായി സ്ഥാപന ഉടമ ഏൽപിച്ച 44 പവൻ തൂക്കം വരുന്ന സ്വർണവുമായാണ് സമീർ കടന്നുകളഞ്ഞത്.
മോഷണത്തിന് പിന്നാലെ പ്രതി സ്ഥാപനത്തിൽ നിന്ന് ഓടിപ്പോകുന്ന സിസിടിവി ദൃശ്യങ്ങൾ പൊലീസിന് ലഭിച്ചിരുന്നു.
തുടർന്ന് നടത്തിയ അന്വേഷണത്തിലാണ് പ്രതി നാട്ടിലേക്ക് കടന്നതായി കണ്ടെത്തിയത്. ഇയാളുടെ പക്കൽ നിന്ന് മോഷ്ടിച്ച സ്വർണവും പൊലീസ് കണ്ടെത്തിയിട്ടുണ്ട്.
