കൊല്ലം: കുടിവെള്ളം ചോദിച്ചെത്തിയ യുവാവ് വയോധികയുടെ സ്വർണമാല പൊട്ടിച്ച് കടന്നുകളഞ്ഞു. പള്ളിശേരിക്കൽ തെക്കേ തേവാനത്ത് വീട്ടിൽ സരസ്വതിയമ്മ (80) യുടെ ഒന്നര പവന്റെ മാലയാണ് യുവാവ് കവർന്നത്. ബുധനാഴ്ച ഉച്ചയോടെയായിരുന്നു സംഭവം. സരസ്വതിയമ്മയും ഭർത്താവും മൈനാഗപ്പള്ളിയിലെ ബന്ധുവീട്ടിൽ പോകാൻ തയാറെടുക്കുമ്പോഴാണ് യുവാവ് എത്തിയത്. മഴക്കോട്ട് ധരിച്ചെത്തിയതിനാൽ ആളെ തിരിച്ചറിയാനായില്ല.
കുടിക്കാനായി യുവാവ് വെള്ളം ചോദിച്ചതിന് പിന്നാലെ, സരസ്വതിയമ്മ വെള്ളം എടുക്കാനായി അകത്തേക്ക് തിരിഞ്ഞപ്പോഴാണ് മാല പൊട്ടിച്ചെടുത്തത്. സരസ്വതി അമ്മ മാലയിൽ പിടിച്ചെങ്കിലും ചെറിയ ഭാഗം മാത്രമാണ് കയ്യിൽ കിട്ടിയത്. ബാക്കിയുമായി കള്ളൻ കടന്നു കളയുകയായിരുന്നു. യുവാവിനൊപ്പമെത്തിയ മറ്റൊരാൾ പുറത്ത് ബൈക്കുമായി കാത്തു നിൽപ്പുണ്ടായിരുന്നു. ഇരുവരും ചേർന്ന് ബൈക്കിൽ കടന്നു കളയുകയും ചെയ്തു. പൊലീസ് കേസെടുത്ത് അന്വേഷണം ആരംഭിച്ചു. പ്രദേശത്തെ സി.സി.ടി.വികൾ അടക്കം കേന്ദ്രീകരിച്ചാണ് അന്വേഷണം.
