ഇടുക്കി ജില്ലയിൽ വീണ്ടും വന്യജീവി ആക്രമണത്തിൽ ദരുണാന്ത്യം. ചിന്നക്കനാൽ സൂര്യനെല്ലിയിൽ കാട്ടാനയുടെ ആക്രമണത്തിൽ ഒരു സ്ത്രീ കൊല്ലപ്പെട്ടു. മകനെ സ്കൂളിൽ വിടാൻ പോകുന്നതിനിടെയാണ് ആക്രമണമുണ്ടായത്. കുട്ടിയുൾപ്പെടെ മൂന്ന് പേർക്ക് പരുക്കേറ്റിട്ടുണ്ട്. അതേസമയം, മൂന്നാർ ജനവാസമേഖലയിൽ ഇറങ്ങിയ കാട്ടാന ‘പടയപ്പ’ വ്യാപക കൃഷിനാശം വരുത്തി.
ചിന്നക്കനാൽ സൂര്യനെല്ലിയിൽ ഇന്ന് രാവിലെയോടെയായിരുന്നു നാടിനെ നടുക്കിയ ദുരന്തം ഉണ്ടായത്. സിങ്ക്കണ്ടം സ്വദേശി വെള്ളസ്വാമിയുടെ മകൾ മാരി (36) ആണ് കാട്ടാനയുടെ ചവിട്ടേറ്റ് മരിച്ചത്. ഇന്ന് രാവിലെ അഞ്ചാം ക്ലാസ് വിദ്യാർത്ഥിയായ മകൻ ദക്ഷനെ സ്കൂളിൽ കൊണ്ടുവിടാൻ പോകുന്നതിനിടയിലാണ് മാരി കാട്ടാനയുടെ മുന്നിൽപ്പെടുന്നത്.
മാരിയെ ആന ചവിട്ടിക്കൊലപ്പെടുത്തുകയായിരുന്നു. ആക്രമണത്തിൽ മകൻ ദക്ഷനും ഒപ്പമുണ്ടായിരുന്ന മറ്റ് രണ്ട് യുവതികൾക്കും സാരമായി പരുക്കേറ്റിട്ടുണ്ട്. വനംവകുപ്പ് ഉദ്യോഗസ്ഥർ സ്ഥലത്തെത്തിയാണ് പരുക്കേറ്റവരെ ഉടൻ തന്നെ ആശുപത്രിയിലേക്ക് മാറ്റിയത്. ഇന്ന് രാവിലെ മുതൽ തന്നെ സൂര്യനെല്ലി ഭാഗത്ത് കാട്ടാനക്കൂട്ടം തമ്പടിച്ചിരുന്നതായും പ്രദേശവാസികൾക്ക് വനംവകുപ്പ് ജാഗ്രതാ നിർദ്ദേശം നൽകിയിരുന്നതായും റിപ്പോർട്ടുകളുണ്ട്.
അതേസമയം മറുവശത്ത്, മൂന്നാറിൽ കാട്ടാന ‘പടയപ്പ’ വീണ്ടും ജനവാസമേഖലയിലിറങ്ങി ഭീതി വിതയ്ക്കുകയാണ്. ഇന്നലെ രാത്രിയോടെ മൂന്നാർ പെരിയവരെ ചോല ഡിവിഷനിലാണ് ആനയിറങ്ങിയത്. കഴിഞ്ഞ ദിവസം കന്നിമല ഭാഗത്തായിരുന്നു പടയപ്പ ഉണ്ടായിരുന്നത്. മണിക്കൂറുകളോളം ജനവാസമേഖലയിൽ തമ്പടിച്ച കാട്ടാന പ്രദേശത്തെ വ്യാപകമായ കൃഷിയാണ് നശിപ്പിച്ചത്. പടയപ്പ നിരന്തരം ജനവാസമേഖലയിൽ ഇറങ്ങുന്നത് തങ്ങളുടെ ജീവനും സ്വത്തിനും ഭീഷണിയാകുന്നുവെന്ന കടുത്ത അമർഷത്തിലാണ് നാട്ടുകാർ.
വന്യജീവി ആക്രമണങ്ങൾ തുടർച്ചയാകുന്ന പശ്ചാത്തലത്തിൽ ഇടുക്കിയിലെ മലയോര മേഖലകളിൽ വനംവകുപ്പ് നിരീക്ഷണം ശക്തമാക്കിയിട്ടുണ്ട്. ജനങ്ങൾ അതീവ ജാഗ്രത പാലിക്കണമെന്ന് അധികൃതർ അറിയിച്ചു.
