നിയുക്ത അമ്പലപ്പുഴ എംഎൽഎ ജി. സുധാകരൻ എഐസിസി സംഘടനാ ചുമതലയുള്ള ജനറൽ സെക്രട്ടറി കെ.സി വേണുഗോപാലുമായി ആലപ്പുഴയിൽ കൂടിക്കാഴ്ച നടത്തി. തികച്ചും സൗഹൃദപരമായ സന്ദർശനമായിരുന്നു ഇതെന്ന് വ്യക്തമാക്കിയ ജി. സുധാകരൻ, താൻ മന്ത്രി പദവി ആവശ്യപ്പെട്ടിട്ടില്ലെന്നും മുൻപും പദവികൾ ചോദിച്ചു വാങ്ങിയിട്ടില്ലെന്നും മാധ്യമങ്ങളോട് പ്രതികരിച്ചു. അതോടൊപ്പം, മുസ്ലിം ലീഗിനെതിരായ വിമർശനങ്ങളുടെ പേരിൽ എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെതിരെ അദ്ദേഹം കടുത്ത ഭാഷയിൽ കടന്നാക്രമിക്കുകയും ചെയ്തു.
മന്ത്രിപദവി ചർച്ചയായില്ല; സൗഹൃദ സന്ദർശനം: തെരഞ്ഞെടുപ്പ് വിജയത്തിന് പിന്നാലെയാണ് അമ്പലപ്പുഴയിൽ നിന്നുള്ള നിയുക്ത എംഎൽഎ ജി. സുധാകരൻ മുതിർന്ന കോൺഗ്രസ് നേതാവ് കെ.സി വേണുഗോപാലിനെ കാണാൻ എത്തിയത്. കൂടിക്കാഴ്ചയിൽ പദവികളെക്കുറിച്ച് യാതൊരു ചർച്ചയും നടന്നിട്ടില്ലെന്ന് അദ്ദേഹം പറഞ്ഞു. വെള്ളാപ്പള്ളി നടേശന്റെ വീട്ടിൽ പോയത് എസ്എൻഡിപി ജനറൽ സെക്രട്ടറി എന്ന നിലയിൽ മാത്രമാണ്. ഭൂരിപക്ഷം മുസ്ലിം വോട്ടുകളും തനിക്കാണ് ലഭിച്ചതെന്നും മുസ്ലിം ജനതയ്ക്ക് തന്നെ നന്നായി അറിയാമെന്നും പറഞ്ഞ സുധാകരൻ, വെള്ളാപ്പള്ളി പറയുന്നത് കേട്ടല്ല മുസ്ലിങ്ങൾ വോട്ട് ചെയ്യുന്നതെന്നും കൂട്ടിച്ചേർത്തു.
വെള്ളാപ്പള്ളിക്ക് കൃത്യമായ രാഷ്ട്രീയമില്ല; ലീഗ് മതേതര പാർട്ടി: വെള്ളാപ്പള്ളി നടേശൻ നേരത്തെ മുതൽക്കേ മുസ്ലിം വിരുദ്ധത പറയുന്ന വ്യക്തിയാണെന്ന് ജി. സുധാകരൻ കുറ്റപ്പെടുത്തി. മുസ്ലിം ലീഗ് ഒരു മതേതര പാർട്ടിയാണ്. വെള്ളാപ്പള്ളി ഇന്നലെ വരെ എൽഡിഎഫ് വരുമെന്നാണ് പറഞ്ഞത്, ഇനി നാളെ അദ്ദേഹം എന്താണ് പറയുക എന്ന് ആർക്കറിയാം എന്നും സുധാകരൻ പരിഹസിച്ചു. കേരളത്തിൽ ഭാവിയിൽ ബിജെപി അധികാരത്തിൽ എത്തിയേക്കാമെന്നും നിലവിൽ അവർക്ക് മൂന്ന് എംഎൽഎമാരും വോട്ട് വിഹിതവും കൂടിയിട്ടുണ്ടെന്നും ചൂണ്ടിക്കാട്ടിയ സുധാകരൻ, പത്ത് വർഷം കഴിഞ്ഞാൽ കേരളത്തിലും ഇൻഡ്യാ മുന്നണി വരുമെന്നും അന്ന് ഇപ്പോൾ കോൺഗ്രസിനെ എതിർക്കുന്നവർ എന്ത് മറുപടി പറയുമെന്നും ചോദിച്ചു.
കെ.സിക്കെതിരായ സൈബർ ആക്രമണം ശരിയല്ല: കെ.സി വേണുഗോപാലിനെതിരെ സോഷ്യൽ മീഡിയയിൽ നടക്കുന്ന സൈബർ അധിക്ഷേപങ്ങൾക്കെതിരെയും ജി. സുധാകരൻ ശക്തമായി പ്രതികരിച്ചു. ഈ അധിക്ഷേപങ്ങൾക്ക് പിന്നിൽ ഏതെങ്കിലും തരത്തിലുള്ള സംഘടിത ശക്തികൾ ഉണ്ടാകുമെന്നുറപ്പാണ്. അത് ആരായാലും ശരിയായ നടപടിയല്ലെന്നും അത്തരം പ്രവണതകൾ അംഗീകരിക്കാൻ കഴിയില്ലെന്നും സുധാകരൻ വ്യക്തമാക്കി.
