കോഴിക്കോട്: രാജ്യദ്രോഹ ഇടപാടുകള്‍ നടന്നെന്ന് സംശയിക്കപ്പെടുന്ന കോഴിക്കോട് സമാന്തര ടെലിഫോണ്‍ എക്‌സ്‌ചേഞ്ച് കേസിലെ മുഖ്യപ്രതി പി പി ഷബീര്‍ അറസ്റ്റില്‍. ഒരു വര്‍ഷമായി ഒളിവില്‍ കഴിയുകയായിരുന്ന പ്രതിയെ വയനാട്ടില്‍ വച്ചാണ് പൊലീസ് പിടികൂടിയത്. കേസില്‍ നാല് പ്രതികളില്‍ മുഖ്യസൂത്രധാരന്മാര്‍ എന്ന് പൊലീസ് കരുതുന്ന രണ്ട് പേരിലൊരാളാണ് ഷബീര്‍.
പ്രതികള്‍ക്കായി നേരത്തെ പൊലീസ് ലുക്ക് ഔട്ട് നോട്ടീസ് പുറപ്പെടുവിച്ചിരുന്നു.വെള്ളിയാഴ്ച രാത്രി വയനാട്, പൊഴുതനകുറിച്യാര്‍മല റോഡ് ജങ്ഷനില്‍വെച്ച് എസ് ഐ പവിത്രന്റ നേതൃത്വത്തിലുള്ള സംഘം വാഹനം തടഞ്ഞുനിര്‍ത്തി ഷബീറിനെ പിടികൂടുകയായിരുന്നു. പൊഴുതനയിലെ റിസോര്‍ട്ടില്‍ എത്തിയതായിരുന്നു ഷബീര്‍.
