മലപ്പുറം: മഞ്ചേരിയിലെ ഷൂട്ടൗട്ട് ത്രില്ലറില്‍ കേരളത്തിന് സന്തോഷ് ട്രോഫി ഏഴാം കിരീടം. അധിക സമയത്തിലേക്കും പെനാല്‍റ്റി ഷൂട്ടൗട്ടിലേക്കും നീണ്ട കളി രണ്ട് മണിക്കൂറോളമാണ് കേരളക്കരയെ മുള്‍ മുനയില്‍ നിര്‍ത്തിയത്. ഷൂട്ടൗട്ടില്‍ രണ്ടാം കിക്ക് ബംഗാള്‍ പാഴാക്കിയത് നിര്‍ണായകമായി. ഒരു ഷോട്ട് പോലും പാഴാക്കാതെ മഞ്ഞപ്പട കാല്‍പന്തിനെ നെഞ്ചോടു ചേര്‍ത്ത കേരളത്തിന് ചെറിയ പെരുന്നാള്‍ സമ്മാനം നല്‍കി.
ഒരു ഗോളിന് പിന്നിട്ട് നിന്ന ശേഷമാണ് കേരളം കളി തിരികെ പിടിച്ചത്. അധിക സമയത്തിന്റെ ഏഴാം മിനുട്ടില്‍ മധ്യനിര താരം ദിലീപ് ഓറോണിന്റെ ഫല്‍യിങ്ങ് ഹെഡ്ഡര്‍ അത്രയും നേരം ആര്‍ത്തിരമ്പിയ മഞ്ചേരി പയ്യനാട് സ്റ്റേഡിയത്തെ നിശ്ശബ്ദമാക്കി. കേരളം ഗോള്‍ ശ്രമങ്ങള്‍ തുടര്‍ന്നെങ്കിലും ലക്ഷ്യം കണ്ടില്ല. കളി തീരാന്‍ നാല് മിനുട്ടുകള്‍ മാത്രം ശേഷിക്കെ കേരളത്തിന്റെ സമനില ഗോളെത്തി. മുഹമ്മദ് സഫ്നാദ് ഹെഡ്ഡറിലൂടെ തന്നെ ബംഗാളിന് മറുപടി നല്‍കി.
അധിക സമയത്തിലേക്ക് നീണ്ട കളിയില്‍ 96-ാം മിനുട്ടില്‍ ദിലീപ് ഓറന്റെ തകര്‍പ്പന്‍ ഗോളിലാണ് ബംഗാള്‍ മുന്നിലെത്തിയത്. കേരളത്തിന്റെ പ്രതിരോധത്തില്‍ വന്ന വീഴ്ചയാണ് ഗോളിന് വഴി തുറന്നത്.117-ാം മിനുട്ടില്‍ സുന്ദര മുന്നേറ്റത്തിലൂടെ കേരളം ഗോള്‍ മടക്കി . നൗഫലിന്റെ ക്രോസില്‍ സഫ്‌നാദിന്റെ സുന്ദര സമനില ഗോള്‍ . അധിക സമയം പിന്നിട്ടതോടെ കളി ടൈബ്രേക്കറിലേക്ക് . ബംഗാളിന്റെ സജല്‍ മാഗിന്റെ കിക്ക് പുറത്തേക്ക് . എല്ലാ കിക്കും വലയിലാക്കി കേരളം കിരീടമണിഞ്ഞു.
