കൊല്ലം ചടയമംഗലത്ത് കാറും ബൈക്കും കൂട്ടിയിടിച്ചുണ്ടായ അപകടത്തിൽ യുവാവ് മരിച്ചു. ബൈക്ക് യാത്രക്കാരനായ റോഡുവിള സ്വദേശി അൻവർഷാ ആണ് മരിച്ചത്. ബൈക്കിലുണ്ടായിരുന്ന മറ്റ് രണ്ട് യുവാക്കൾക്ക് ഗുരുതരമായി പരുക്കേറ്റു.
എം സി റോഡിൽ രാത്രി എട്ടരയോടെയായിരുന്നു ദാരുണമായ അപകടം സംഭവിച്ചത്. ആയൂരിൽ നിന്നും ചടയമംഗലം ഭാഗത്തേക്ക് വരികയായിരുന്ന കാർ, എം സി റോഡിലേക്ക് പ്രവേശിക്കുകയായിരുന്ന ബൈക്കുമായി കൂട്ടിയിടിക്കുകയായിരുന്നു. ഒരേ ബൈക്കിൽ സഞ്ചരിക്കുകയായിരുന്ന മൂന്ന് പേരാണ് അപകടത്തിൽപ്പെട്ടത്.
അപകടം നടന്നയുടൻ തന്നെ ഗുരുതരമായി പരിക്കേറ്റ മൂന്നുപേരെയും നാട്ടുകാർ ചേർന്ന് കടയ്ക്കൽ താലൂക്ക് ആശുപത്രിയിൽ എത്തിച്ചെങ്കിലും റോഡുവിള സ്വദേശിയായ ഇരുപത്തിമൂന്നുകാരൻ അൻവർഷായുടെ ജീവൻ രക്ഷിക്കാനായില്ല.
അപകടത്തിൽ ഗുരുതരമായി പരിക്കേറ്റ മറ്റ് രണ്ട് ബൈക്ക് യാത്രക്കാരായ അജ്മൽ (26), അഫ്സൽ (22) എന്നിവരെ അടിയന്തര വിദഗ്ധ ചികിത്സയ്ക്കായി തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇവരുടെ പരിക്ക് ഗുരുതരമാണെന്നാണ് വിവരം.
കടയ്ക്കൽ താലൂക്ക് ആശുപത്രി മോർച്ചറിയിൽ സൂക്ഷിച്ചിരുന്ന അൻവർഷായുടെ മൃതദേഹം പോസ്റ്റുമോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകി. ചടയമംഗലം പോലീസ് സംഭവത്തിൽ കേസെടുത്ത് അന്വേഷണം ആരംഭിച്ചിട്ടുണ്ട്.
