മൂവാറ്റുപുഴ: വഖഫ് ബോര്‍ഡിലെ ക്രമക്കേടില്‍ സിഇഒ അടക്കം നാല് പേര്‍ക്കെതിരെ വിജിലന്‍സ് അന്വേഷണത്തിന് സര്‍ക്കാര്‍ അനുമതി. 2016ല്‍ മൂവാറ്റുപുഴ വിജിലന്‍സ് കോടതി അന്വേഷണത്തിന് ഉത്തരവിട്ട കേസിലാണ് സര്‍ക്കാര്‍ അനുമതി നല്‍കിയത്. വഖഫ് ബോര്‍ഡിലെ സാമ്പത്തിക ക്രമക്കേടുകളും അനധികൃത നിയമങ്ങളും ആരോപിച്ച് കാക്കനാട് സ്വദേശി ടിഎം അബ്ദുല്‍ സലാം നല്‍കിയ ഹര്‍ജിയില്‍ 2016ല്‍ മൂവാറ്റുപുഴ വിജിലന്‍സ് കോടതി പുറപ്പെടുവിച്ച ഉത്തരവിന്റെ അടിസ്ഥാനത്തിലാണ് സര്‍ക്കാര്‍ തീരുമാനം. ഇത് സംബന്ധിച്ച് മാര്‍ച്ച് 12ന് സര്‍ക്കാര്‍ വിജ്ഞാപനം പുറപ്പെടുവിച്ചു. കഴിഞ്ഞ നാല് വര്‍ഷമായി വിജിലന്‍സ് നടപടികള്‍ നിലച്ചിരിക്കുകയാണെന്ന് ചൂണ്ടിക്കാട്ടി നേരത്തെ അബ്ദുല്‍സാലാം ഹൈക്കോടതിയെ സമീപിച്ചിരുന്നു. സര്‍ക്കാര്‍ അനമുതി ലഭിക്കാത്തതിനാലായിരുന്നു ഇത്. കേസന്വേഷണത്തിന് അഴിമതി നിരോധന നിയമപ്രകാരം സര്‍ക്കാറിന്റെ മുന്‍കൂര്‍ അനുമതി വേണ്ടതുണ്ട്. ഇതിന്റെ അടിസ്ഥാനത്തിലാണ് ഇപ്പോള്‍ വിജിലന്‍സ് അന്വേഷണത്തിന് അനുമതി നല്‍കിയിരിക്കുന്നത്.
