മലപ്പുറം കരുവാരകുണ്ട് വാഴത്തോട്ടത്തില്‍ കാവല്‍നിന്ന 2 വളര്‍ത്തുനായ്ക്കളെ അജ്ഞാത ജീവി കടിച്ചു കൊന്നു. നായ്ക്കളെ കടുവ കൊന്നത് കണ്ടതായി അതിഥിത്തൊഴിലാളി അറിയിച്ചു. ആര്‍ത്തലക്കുന്ന് കോളനിക്കു സമീപം സിടി എസ്‌റ്റേറ്റിലാണ് അജ്ഞാത ജീവി വളര്‍ത്തുനായ്ക്കളെ കൊന്നത്. കഴിഞ്ഞ ദിവസം അര്‍ധരാത്രിയാണ് സംഭവം.മാമ്പറ്റ സി.പി. ഷൗക്കത്തലി പാട്ടത്തിനെടുത്ത സ്ഥലത്താണ് അജ്ഞാത ജീവിയെ കണ്ടത്. രാത്രിയില്‍ 3 നായ്ക്കളെയാണ് പറമ്പില്‍ തുറന്നുവിട്ടിരുന്നത്.
തോട്ടത്തില്‍ അതിഥിത്തൊഴിലാളിയായ ബംഗ്ലാദാസും താമസിച്ചിരുന്നു. രാത്രിയില്‍ ശബ്ദം കേട്ട് പുറത്തിറങ്ങിയപ്പോള്‍ ടോര്‍ച്ചിന്റെ പ്രകാശത്തിലാണ് കടുവയെ കണ്ടതെന്ന് ഇയാള്‍ പറഞ്ഞു. 2 നായ്ക്കളെ കൊന്ന നിലയില്‍ തൊട്ടപ്പുറത്ത് കണ്ടെത്തി. ഒരു നായയെ കണ്ടെത്താനായില്ല. 3 മാസങ്ങള്‍ക്ക് മുന്‍പ് 3 നായ്ക്കളെ ഇതേ തോട്ടത്തില്‍നിന്ന് കാണാതായിരുന്നു.
