തിരുവന്തപുരം: ഇരുപത്താറാമത് കേരള രാജ്യാന്തര ചലച്ചിത്രമേളയ്ക്ക് വെള്ളിയാഴ്ച തുടക്കമാകും. വൈകിട്ട് 6.30ന് നിശാഗന്ധിയില് മുഖ്യമന്ത്രി പിണറായി വിജയന് മേള ഉദ്ഘാടനംചെയ്യും. സാംസ്കാരികമന്ത്രി സജി ചെറിയാന് അധ്യക്ഷനാകും. സംവിധായകന് അനുരാഗ് കശ്യപാണ് മുഖ്യാതിഥി. ഐഎസിന്റെ ബോംബാക്രമണത്തില് ഇരുകാലും നഷ്ടപ്പെട്ട ഖുര്ദിഷ് സംവിധായിക ലിസ ചലാന് ചടങ്ങില് മുഖ്യമന്ത്രി സ്പിരിറ്റ് ഓഫ് സിനിമ അവാര്ഡ് സമ്മാനിക്കും.
ഫെസ്റ്റിവല് ഹാന്ഡ്ബുക്ക് മന്ത്രി വി ശിവന്കുട്ടി ഗതാഗത മന്ത്രി ആന്റണി രാജുവിനും ഫെസ്റ്റിവല് ബുള്ളറ്റിന് ഭക്ഷ്യമന്ത്രി ജി ആര് അനില് മേയര് ആര്യാ രാജേന്ദ്രനും നല്കി പ്രകാശിപ്പിക്കും. വി കെ പ്രശാന്ത് എംഎല്എ ചലച്ചിത്ര അക്കാദമി പ്രസിദ്ധീകരണമായ സമീക്ഷയുടെ ഫെസ്റ്റിവല് പതിപ്പ് പുറത്തിറക്കും. കെഎസ്എഫ്ഡിസി ചെയര്മാന് ഷാജി എന് കരുണ് മാസിക ഏറ്റുവാങ്ങും.
