തിരുവനന്തപുരം: കേരളത്തില്‍ വരും ദിവസങ്ങളില്‍ ചൂട് കുറയുമെന്ന് കേന്ദ്ര കാലാവസ്ഥ നിരീക്ഷണ കേന്ദ്രം. ആവശ്യത്തിന് വേനല്‍ മഴ കേരളത്തില്‍ ലഭിക്കുമെന്ന് കാലാവസ്ഥാ നിരീക്ഷണ കേന്ദ്രം മേധാവി ഡോക്ടര്‍ സതി ദേവി അറിയിച്ചു. ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദം ചുഴലിക്കാറ്റായി മാറുമെങ്കിലും ഇന്ത്യന്‍ തീരത്തിന് ഭീഷണി ആകില്ലെന്നും കേന്ദ്ര കാലാവസ്ഥാ നിരീക്ഷണ കേന്ദ്രം അറിയിച്ചു.
കഴിഞ്ഞ കുറേ ദിവസമായി കാറ്റിന്റെ സഞ്ചാരം കിഴക്ക് നിന്ന് പടിഞ്ഞാറേക്ക് ആയതാണ് നിലവില്‍ സംസ്ഥാനത്ത് രേഖപ്പെടുത്തുന്ന ശക്തമായ ചൂടിന് കാരണം. എന്നാല്‍ വരും ദിവസങ്ങളില്‍ അതിന് മാറ്റമുണ്ടാകും. പടിഞ്ഞാറന്‍ ദിശയില്‍ കാറ്റ് വീശുന്നത് സംസ്ഥാനത്തെ താപനില കുറക്കുമെന്നാണ് കേന്ദ്ര കാലാവസ്ഥാ നിരീക്ഷണ കേന്ദ്രം മേധാവി പറയുന്നത്.
നിലവില്‍ സംസ്ഥാനത്ത് രേഖപ്പെടുത്തിയ വേനല്‍ മഴയുടെ തോത് കുറവാണെങ്കിലും വരും ദിവസങ്ങളില്‍ അതിനും മാറ്റമുണ്ടാകും. ഒറ്റപ്പെട്ടയിടങ്ങളില്‍ ഇടിമിന്നലോട് കൂടിയ ശക്തമായ മഴ ഉണ്ടാകാനുള്ള സാധ്യതയാണ് കേന്ദ്രകാലാവസ്ഥാ നിരീക്ഷണ കേന്ദ്രം പ്രവചിക്കുന്നത്.
