പാലക്കാട്: എലപ്പുളിയിലെ പോപ്പുലര് ഫ്രണ്ട് പ്രവര്ത്തകന് സുബൈറിനെ കൊലപ്പെടുത്തിയ കേസില് ഇന്നലെ കസ്റ്റഡിയിലെടുത്ത പ്രതികളുടെ അറസ്റ്റ് ഇന്ന് രേഖപ്പെടുത്തും. കസ്റ്റഡിയിലെടുത്ത മൂന്ന് പ്രതികളെ പൊലീസ് വിശദമായി ചോദ്യം ചെയ്തു. ഇവര്ക്കൊപ്പമുണ്ടായിരുന്ന മറ്റ് സംഘാംഗങ്ങളെക്കുറിച്ചും പൊലീസിന് വ്യക്തമായ സൂചന ലഭിച്ചിട്ടുണ്ട്. ആര്എസ്എസ് പ്രവര്ത്തകന് ശ്രീനിവാസന് കൊലപാതകത്തിലും പൊലീസ് നിരവധി പേരെ കസ്റ്റഡിയിലെടുത്ത് ചോദ്യം ചെയ്തിട്ടുണ്ട്.
കസ്റ്റഡിയിലെടുത്ത മൂന്ന് പ്രതികളില് നിന്ന് നിര്ണ്ണായക വിവരങ്ങള് ലഭിച്ചെന്നാണ് പൊലീസ് വ്യക്തമാക്കുന്നത്. ഇവരുടെ മൊഴികളില് നിന്ന് മറ്റ് പ്രതികളെകുറിച്ചും പൊലീസിന് സൂചന ലഭിച്ചിട്ടുണ്ട്. സൈബര് സെല്ലിന്റെ സഹായത്തോടെ ഫോണ് രേഖകള് പരിശോധിച്ച് നടത്തിയ അന്വേഷണത്തിലാണ് സംഘത്തെ വലയിലാക്കാനായത്. കൊലപാതകത്തിനു ശേഷം വാഹനം ഉപേക്ഷിച്ച് പ്രതികള് കടന്നു കളയുന്നതിന്റെ സിസിടിവി ദൃശ്യങ്ങള് റിപ്പോര്ട്ടര് ടിവിക്ക് ലഭിച്ചു.
ഇന്നലെ രഹസ്യകേന്ദ്രത്തില് മണിക്കൂറുകളോളം ഇവരെ ചോദ്യം ചെയ്ത പ്രതികളുടെ അറസ്റ്റ് ഇന്ന് രേഖപ്പെടുത്തിയേക്കുമെന്നാണ് സൂചന. ചോദ്യം ചെയ്യാനായി കസ്റ്റഡിയിലുള്ള മറ്റുള്ളവരുടെ അറസ്റ്റും വൈകാതെ ഉണ്ടാകും. ആര്എസ്എസ് പ്രവര്ത്തകന് ശ്രീനിവാസന്റെ കൊലപാതകത്തില് പ്രതികള് നാട് വിട്ടുവെന്നാണ് പൊലീസ് കരുതുന്നത്. സംസ്ഥാനത്തിന് പുറത്തും അന്വേഷണം വ്യാപിക്കുന്നുണ്ട്. ഇന്ന് ജില്ലാ പൊലീസ് മേധാവി അന്വേഷണ പുരോഗതി വ്യക്തമാക്കാന് മാധ്യമങ്ങളെ കാണും. എഡിജിപി വിജയ് സാഖറെയും ജില്ലയില് ക്യാമ്പ് ചെയ്യുന്നുണ്ട്