കൊല്ലത്ത് പൊലീസിന് പിടികൊടുക്കാതെ ഒളിച്ചുനടന്ന പീഡനശ്രമക്കേസ് പ്രതി ലിഫ്റ്റ് ചോദിച്ച് കയറിയത് തന്നെ അന്വേഷിച്ചുനടന്ന എസ് ഐയുടെതന്നെ സ്കൂട്ടറില്. അപകടം തിരിച്ചറിഞ്ഞ പ്രതി ഓടിരക്ഷപ്പെടാന് ശ്രമിച്ചെങ്കിലും പിടിയിലായി. കൊല്ലം ജില്ലയിലാണ് സംഭവം.
കിഴക്കേ കല്ലട സ്വദേശിനിയെ രാത്രി വീട്ടില്ക്കയറി ലൈംഗികമായി പീഡിപ്പിക്കാന് ശ്രമിച്ച കേസിലെ പ്രതി കൊടുവിള കരാചരുവില്വീട്ടില് ജോമോന് (19) ആണ് പിടിയിലായത്. മറ്റൊരു കേസ് അന്വേഷിക്കാനുള്ള യാത്രയിലായിരുന്ന സ്പെഷ്യല് ബ്രാഞ്ച് എസ് ഐ ബിന്സ്രാജിനോടാണ് ജോമോന് ലിഫ്റ്റ് ചോദിച്ചത്.
കൊല്ലംതേനി പാതയില് അലിന്ഡ് ഫാക്ടറിക്ക് മുന്നിലെത്തിയപ്പോഴാണ് എസ് ഐയുടെ സ്കൂട്ടറിലാണ് ലിഫ്റ്റ് ചോദിച്ചു കയറിയതെന്ന് ജോമോന് മനസിലാക്കിയത്. ഇറങ്ങി ഓടുന്നതിനിടെ ജോമോനെ എസ് ഐ പിടികൂടാന് ശ്രമിച്ചെങ്കിലും രക്ഷപ്പെട്ടു. പൊന്തക്കാട്ടില് ഒളിച്ച പ്രതിയെ എസ്ഐയും അലിന്ഡിനു മുന്നില് സമരം ചെയ്യുകയായിരുന്ന യുഡിഎഫ് പ്രവര്ത്തകരും ചേര്ന്ന് പിടികൂടുകയായിരുന്നു.
കുണ്ടറ സ്റ്റേഷനിലെത്തിച്ച പ്രതിയെ പിന്നീട് കിഴക്കേ കല്ലട പൊലീസിന് കൈമാറി. കിഴക്കേ കല്ലട സ്റ്റേഷനില് മോഷണമുള്പ്പെടെ കേസുകളിലെ പ്രതിയാണ് ജോമോനെന്ന് പൊലീസ് പറഞ്ഞു.
