ന്യൂഡല്‍ഹി: ലൈംഗികാതിക്രമക്കേസില്‍ എഴുത്തുകാരന്‍ സിവിക് ചന്ദ്രന് മുന്‍കൂര്‍ ജാമ്യം അനുവദിച്ചു കൊണ്ടുളള കോടതി ഉത്തരവിലെ പരാമര്‍ശങ്ങള്‍ക്കെതിരെ ദേശീയ വനിതാ കമ്മീഷന്‍. പരാതിക്കാരിയുടെ വസ്ത്രം സംബന്ധിച്ച കോഴിക്കോട് സെഷന്‍സ് കോടതിയുടെ നിരീക്ഷണങ്ങള്‍ അങ്ങേയറ്റം ദൗര്‍ഭാഗ്യകരമാണെന്നെന്ന് അധ്യക്ഷ രേഖാ ശര്‍മ ട്വീറ്റ് ചെയ്തു. കോടതിയുടെ നിരീക്ഷണങ്ങളെ ശക്തമായി അപലപിക്കുന്നുവെന്നും ഉത്തരവിന്റെ ദൂരവ്യാപകമായ അനന്തരഫലങ്ങള്‍ കോടതി അവഗണിച്ചുവെന്നും രേഖ ശര്‍മ കുറ്റപ്പെടുത്തി.
കോഴിക്കോട് സെഷന്‍സ് കോടതി ജഡ്ജി എസ് കൃഷ്ണകുമാറാണ് സിവിക് ചന്ദ്രന് മുന്‍കൂര്‍ ജാമ്യം അനുവദിച്ച് വിവാദ ഉത്തരവ് പുറപ്പെടുവിച്ചത്. പരാതിക്കാധാരമായ സംഭവം നടന്ന ദിവസത്തെ പ്രതി ഹാജരാക്കിയ ഫോട്ടോകള്‍ തെളിവായെടുത്താണ് കോടതി നിലപാടെടുത്തത്. യുവതിയുടെ ശരീരഭാഗങ്ങള്‍ കാണുന്ന നിലയിലായിരുന്നു ഫോട്ടോ. ഇത്തരത്തില്‍ യുവതി പ്രകോപനമുണ്ടാക്കുന്ന വസ്ത്രം ധരിച്ചതിനാല്‍ പീഡനത്തിനുള്ള 354-എ വകുപ്പ് നിലനില്‍ക്കില്ലെന്നായിരുന്നു കോടതി നിലപാട്.
