തിരുവനന്തപുരം: പ്രഥമ കേരളശ്രീ പുരസ്കാരം സ്വീകരിക്കില്ലെന്ന് ശില്പി കാനായി കുഞ്ഞിരാമന്. ശില്പങ്ങളുടെ ശോഭ കെടുത്തുന്ന നടപടികളില് പ്രതിഷേധിച്ചാണ് തീരുമാനമെന്നും പുരസ്കാരം സ്വീകരിക്കില്ലെന്ന് സര്ക്കാരിനെ ഔദ്യോഗികമായി അറിയിക്കുമെന്നും കാനായി കുഞ്ഞിരാമന് മാധ്യമങ്ങളോട് പറഞ്ഞു.
പത്മ പുരസ്കാരങ്ങളുടെ മാതൃകയില് സംസ്ഥാന സര്ക്കാര് നല്കുന്ന കേരള പുരസ്കാരങ്ങള് ഇന്നലെയാണ് പ്രഖ്യാപിച്ചത്. എം.ടി വാസുദേവന് നായര്ക്കാണ് കേരള ജ്യോതി പുരസ്കാരം. ഓംചേരി എന്.എന് പിള്ള, ടി. മാധവ മേനോന്, മമ്മൂട്ടി എന്നിവര് കേരള പ്രഭ പുരസ്കാരത്തിനും ഡോ. സത്യഭാമാദാസ് ബിജു, ഗോപിനാഥ് മുതുകാട്, കാനായി കുഞ്ഞിരാമന്, കൊച്ചൗസേഫ് ചിറ്റിലപ്പള്ളി, എം.പി പരമേശ്വരന്, വൈക്കം വിജയലക്ഷ്മി എന്നിവര് കേരള ശ്രീ പുരസ്കാരത്തിനും അര്ഹരായി.