രാജ്യത്ത് പെട്രോളിന്റെയും ഡീസലിന്റെയും പുതുക്കിയ വില നിലവില്‍ വന്നു. കേന്ദ്രം എക്സൈസ് തീരുവ കുറച്ചതോടെ അര്‍ധരാത്രി മുതല്‍ കുറഞ്ഞ വില പ്രാബല്യത്തിലായി. പെട്രോളിന് എക്സൈസ് തീരുവ എട്ട് രൂപയും ഡീസല്‍ ലിറ്ററിന് ആറ് രൂപയുമാണ് കുറച്ചത്. ഇതോടെ പെട്രോള്‍ ലിറ്ററിന് 9.50 രൂപയും ഡീസലിന് ഏഴ് രൂപയും കുറഞ്ഞു. കേരളത്തില്‍ പെട്രോള്‍ ലിറ്ററിന് 10.52 രൂപയും ഡീസലിന് 7.40 രൂപയുമാണ് കുറഞ്ഞത്
തിരുവനന്തപുരത്തെ പെട്രോള്‍ വില 106.74 രൂപയായി. ഡീസലിന് 96.58 രൂപയാണ്. കൊച്ചിയില്‍ പെട്രോളിന് 104.62 രൂപയും ഡീസലിന് 92.63 രൂപയുമായി. കോഴിക്കോട് പെട്രോളിന് 104.92 രൂപയും ഡീസലിന് 94.89 രൂപയുമായി. അതേസമയം ഇന്ധന വില കുറയ്ക്കല്‍ ജനങ്ങളുടെ കണ്ണില്‍ പൊടിയിടാനാണെന്ന് കോണ്‍ഗ്രസും ശിവസേനയും ആരോപിച്ചു. ആത്മാര്‍ഥതയുണ്ടെങ്കില്‍ എക്സൈസ് നികുതി യുപിഎ സര്‍ക്കാരിന്റെ കാലത്തേതിന് തുല്യമായി കുറയ്ക്കണമെന്ന് കോണ്‍ഗ്രസ് ആവശ്യപ്പെട്ടു.
