കനത്ത സുരക്ഷയില്‍ രാമക്ഷേത്ര പ്രതിഷ്ഠാ ചടങ്ങിന് മണിക്കൂറുകള്‍ മാത്രം. വിവിധ അതിര്‍ത്തിയില്‍ നിരീക്ഷണവും വാഹന പരിശോധനയും ശക്തമാക്കി. പ്രതിഷ്ഠാ ചടങ്ങും റിപ്പബ്ലിക് ദിനാഘോഷവും കണക്കിലെടുത്ത് ഡല്‍ഹിയിലും അതീവ ജാഗ്രത നിര്‍ദ്ദേശം നല്‍കി. പ്രതിഷ്ഠാ ചടങ്ങിന് മുന്നോടിയായുള്ള പ്രത്യേക പൂജകള്‍ രാമക്ഷേത്രത്തില്‍ തുടരുകയാണ്. നാളെ വൈകിട്ടേടെ പ്രധാനമന്ത്രി നരേന്ദ്ര മോദി അയോധ്യയില്‍ എത്തും. ജനുവരി 22 ന് ഉച്ചവരെ ഡല്‍ഹിയിലും ഗുജറാത്തിലും സര്‍ക്കാര്‍ സ്ഥാപനങ്ങള്‍ക്കും വിദ്യാഭ്യാസ സ്ഥാപനങ്ങള്‍ക്കും ഉച്ചവരെ അവധി നല്‍കി. ഡല്‍ഹി ബാബര്‍ റോഡിന്റെ പേര് അയോധ്യാ മാര്‍ഗ് എന്നാക്കി ഹിന്ദു സേനാ പ്രവര്‍ത്തകര്‍ സ്റ്റിക്കര്‍ പതിച്ചു. രാമക്ഷേത്രവുമായി ബന്ധപ്പെട്ട പാര്‍ട്ടി നിലപാടില്‍ പ്രതിഷേധിച്ച് ഗുജറാത്തിലെ കോണ്‍ഗ്രസ് എംഎല്‍എ രാജിവച്ചു. വിജാപൂര്‍ എംഎല്‍എ സി ജെ ചാവ്ഡയാണ് രാജിവെച്ചത്. ജനുവരി 22 നാണ് അയോധ്യയില്‍ രാമക്ഷേത്ര ഉദ്ഘാടനം. ചടങ്ങിന്റെ ഭാഗമായി 11 സംസ്ഥാനങ്ങളാണ് അവധി പ്രഖ്യാപിച്ചിരിക്കുന്നത്. അയോധ്യയിലെ രാമക്ഷത്രാ പ്രതിഷ്ഠയോടനുബന്ധിച്ചാണ് അവധി. അവധി പ്രഖ്യാപിച്ചതില്‍ ഭൂരിഭാഗവും ബിജെപി ഭരണത്തിലുള്ള സംസ്ഥാനങ്ങളാണ്. ഉത്തര്‍പ്രദേശ്, ഗോവ, ഹരിയാണ, മധ്യപ്രദേശ്, അസം, ഒഡീഷ, ഛത്തീസ്ഗഢ്, ഗുജറാത്ത്, ത്രിപുര, മഹാരാഷ്ട്ര, രാജസ്ഥാന്‍ എന്നീ സംസ്ഥാനങ്ങളിലാണ് 22ന് പൂര്‍ണമായോ ഭാഗികമായോ അവധി പ്രഖ്യാപിച്ചിരിക്കുന്നത്.
