വളാഞ്ചേരി: ഇരിമ്പിളിയം സ്വദേശിയും എഴുത്തുകാരനും മാധ്യമപ്രവര്‍ത്തകനുമായി നാസര്‍ ഇരിമ്പിളിയം സംവിധാനം ചെയ്യുന്ന ചിത്രത്തിന്റെ ഷൂട്ടിങ് ആരംഭിച്ചു. ഐമാക് ക്രിയേഷന്‍സിന്റെ ബാനറില്‍ ഡോ. അര്‍ജുന്‍ പരമേശ്വര്‍ ആര്‍ നിര്‍മിക്കുന്ന സിനിമയുടെ രചന നിർവഹിച്ചിരിക്കുന്നത് ഡോ.ഹാരിസ് കെ ടി യാണ്. വളാഞ്ചേരിയില്‍ നടന്ന ചടങ്ങില്‍ സ്വിച്ച് ഓണ്‍ കര്‍മം പ്രശസ്ത സംവിധായകന്‍ ലാല്‍ ജോസ് നിര്‍വഹിച്ചു.മഹല്‍ ഇന്‍ ദ നേം ഓഫ് ഫാദര്‍ എന്ന് പേരിട്ടിരിക്കുന്ന ചിത്രത്തിന്റെ ടൈറ്റില്‍ ലോഞ്ചിങ് കെടി ജലീല്‍ എംഎല്‍എ നിര്‍വഹിച്ചു.ചിത്രത്തിന്റെ ഫസ്റ്റ് ക്ലാപ്പ് വളാഞ്ചേരി നഗരസഭ ചെയര്‍മാന്‍ അഷ്‌റഫ് അമ്പലത്തിങ്ങല്‍ നിര്‍വഹിച്ചു. മുഴുവനായും വളാഞ്ചേരിയിലും പരിസരപ്രദേശങ്ങളിലും ചിത്രീകരിക്കുന്ന ചിത്രത്തില്‍ ഷഹീന്‍ സിദ്ധീഖ്, ഉണ്ണി നായര്‍ എന്നിവരാണ് കേന്ദ്രകഥാപാത്രങ്ങളായെത്തുന്നത്. പുതുമുഖ നടി സുപർണയാണ് നായികാവേഷത്തിലെത്തുന്നത്.
