കേരളത്തില്‍ തുലാവര്‍ഷം സാധാരണയില്‍ കൂടുതലാകുമെന്ന് ദേശീയ, അന്താരാഷ്ട്ര കാലാവസ്ഥാ ഏജന്‍സികളുടെ പ്രവചനം. കേന്ദ്ര കാലാവസ്ഥാവകുപ്പടക്കം 10 ഏജന്‍സികളാണ് മികച്ച മഴ പ്രവചിക്കുന്നത്. ഒക്‌ടോബര്‍ മുതല്‍ ഡിസംബര്‍ വരെ പെയ്യുന്ന മഴയാണ് തുലാവര്‍ഷമായി കണക്കാക്കുന്നത്. ശാസ്ത്രീയമായി, ഇപ്പോഴത്തെ മഴ കാലവര്‍ഷംതന്നെയാണ്. മിക്കവാറും ഈ മാസം മൂന്നാമത്തെ ആഴ്ചയാകും തുലാവര്‍ഷ പ്രഖ്യാപനം.
കേന്ദ്ര കലാവസ്ഥാവകുപ്പ്, ജപ്പാന്‍ മീറ്റിയറോളജിക്കല്‍ ഏജന്‍സി, യൂറോപ്യന്‍ സെന്റര്‍ ഫോര്‍ മീഡിയം റേയ്ഞ്ച് വെതര്‍ ഫോര്‍കാസ്റ്റ്, കോപ്പര്‍നിക്കസ് കാലാവസ്ഥാ സര്‍വീസ്, ലോക കാലാവസ്ഥാ സംഘടന, അപെക് കാലാവസ്ഥാകേന്ദ്രം– ദക്ഷിണ കൊറിയ, യുകെ മെറ്റ് ഓഫീസ്, ഓസ്‌ട്രേലിയന്‍ കാലാവസ്ഥാ ഏജന്‍സി, അമേരിക്കന്‍ നാഷണല്‍ സെന്റര്‍ ഫോര്‍ എന്‍വയണ്‍മെന്റല്‍ പ്രെഡിക്ഷന്‍ എന്നീ ഏജന്‍സികളാണ് മികച്ച തുലാവര്‍ഷം പ്രവചിച്ചത്. ഇതില്‍ ചില ഏജന്‍സികള്‍ തെക്കന്‍ കേരളത്തിലാണ് ശക്തമായ മഴ പ്രവചിക്കുന്നത്.
അതേസമയം, തുലാവര്‍ഷം കൂടുതലും ന്യൂനമര്‍ദത്തെയും ചുഴലിക്കാറ്റിനെയും ആശ്രയിച്ചാണ്. അതിനാല്‍, നേരത്തെ പ്രവചിക്കുന്നത് ബുദ്ധിമുട്ടാണെന്ന വാദവുമുണ്ട്.
