മലപ്പുറം: ജില്ലാ പഞ്ചായത്ത് വിജയഭേരി പദ്ധതിയുടെ അച്ചടിക്ക് കരാര്‍ നല്‍കിയത് അന്വേഷിക്കാന്‍ തദ്ദേശഭരണ വകുപ്പ് തീരുമാനം. ഇ– ടെന്‍ഡറിന് പകരം ക്വട്ടേഷന്‍ ക്ഷണിച്ച് 6.58 ലക്ഷംരൂപയുടെ അച്ചടി നിര്‍വഹിച്ചതാണ് അന്വേഷിക്കുന്നത്. നിര്‍വഹണണ ഉദ്യോഗസ്ഥനെതിരെ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ പഞ്ചായത്ത് ഡയറക്ടറെ ചുമതലപ്പെടുത്തി. ചെലവ് തുക നല്‍കാനും തദ്ദേശഭരണ വകുപ്പ് അനുമതിയും നല്‍കി. കഴിഞ്ഞ ദിവസം തലസ്ഥാനത്ത് നടന്ന തദ്ദേശഭരണ വകുപ്പ് കോ ഓര്‍ഡിനേഷന്‍ കമ്മിറ്റിയുടേതാണ് തീരുമാനം.എസ്എസ്എല്‍സി, പ്ലസ്ടു വിദ്യാര്‍ഥികളുടെ പരീക്ഷാ പരിശീലനത്തിനായി ജില്ലാ പഞ്ചായത്ത് 2020–21 സാമ്പത്തിക വര്‍ഷം വിജയഭേരി പദ്ധതി ഉള്‍പ്പെടുത്തിയിരുന്നു. ഇതിനുള്ള അധ്യാപക പരിശീലനത്തിനാണ് 6,58,670 രൂപയുടെ അച്ചടി നിര്‍വഹിച്ചത്. കോവിഡ് സാഹചര്യമായതിനാലാണ് ഇ–ടെന്‍ഡര്‍ വിളിക്കാതെ ക്വട്ടേഷന്‍ ക്ഷണിച്ച് അച്ചടി നിര്‍വഹിച്ചതെന്നാണ് ജില്ലാ പഞ്ചായത്തിന്റെ വാദം. ഈ തുക അനുവദിക്കണമെന്ന് ജില്ലാ പഞ്ചായത്ത് ആവശ്യപ്പെട്ടിരുന്നു. തുടര്‍ന്ന് പഞ്ചായത്ത് ഡയറക്ടര്‍ അന്വേഷണം നടത്തി സര്‍ക്കാരിന് റിപ്പോര്‍ട്ട് നല്‍കി. ഇ–ടെന്‍ഡര്‍ ക്ഷണിക്കാത്തത് നിയമ വിരുദ്ധമാണെന്ന് റിപ്പോര്‍ട്ടിലുണ്ട്. തുടര്‍ന്നാണ് അന്വേഷണത്തിന് തീരുമാനിച്ചത്.
