കോഴിക്കോട് അരയിടത്ത് പാലത്തെ ബസ് അപകടത്തില്‍ ചികിത്സയിലായിരുന്ന ബൈക്ക് യാത്രികന്‍ മരിച്ചു. കൊമ്മേരി അനന്തന്‍ ബസാര്‍ സ്വദേശി മുഹമ്മദ് സാനിഹ് (27) ആണ് മരിച്ചത്. കോഴിക്കോട്ടെ സ്വകാര്യ ആശുപത്രിയില്‍ ചികിത്സയില്‍ കഴിയുകയായിരുന്നു. അമിത വേഗത്തില്‍ ബസ് മറിഞ്ഞു ആയിരുന്നു അപകടം. സാനിഹിന്റെ ബൈക്കിന് മുകളിലേക്കായിരുന്നു ബസ് മറിഞ്ഞത്.
ബസിന്റെ അമിത വേഗതയാണ് അപടത്തിനിടയാക്കിയത്. പ്രാഥമിക അന്വേഷണ റിപ്പോര്‍ട്ട് ഗതാഗത വകുപ്പിന് എന്‍ഫോഴ്‌സ്‌മെന്റ് ആര്‍ടിഒ സമര്‍പ്പിച്ചു. അമിത വേഗതയില്‍ ഓവര്‍ടേക്ക് ചെയ്യുന്നതിനിടയില്‍ നിയന്ത്രണം നഷ്ടമായി എന്നാണ് കണ്ടെത്തല്‍. അപകടത്തിന് പിന്നാലെ ബസ് ഡ്രൈവര്‍ ഒളിവില്‍ പോയി. മെഡിക്കല്‍ കോളജ് റൂട്ടില്‍ ഓടുന്ന കെഎല്‍ 12 സി 6676 ബസാണ് മറിഞ്ഞത്. ബസ് ഡ്രൈവര്‍ക്ക് എതിരെ മെഡിക്കല്‍ കോളേജ് പോലീസ് എടുത്ത കേസില്‍ അന്വേഷണം തുടരുന്നു.
ചൊവ്വാഴ്ച വൈകിട്ട് നാലുമണിയോടെ, ഗോകുലം മാള്‍ ഓവര്‍ ബ്രിഡ്ജിന് സമീപത്തായിരുന്നു അപകടം. പുതിയ സ്റ്റാന്‍ഡ് ഭാഗത്തേക്കു പാലം കയറി വരികയായിരുന്ന ബൈക്കും പാലം ഇറങ്ങുകയായിരുന്ന ബസുമാണ് കൂട്ടിയിടിച്ചത്. ബൈക്കില്‍ത്തട്ടി നിയന്ത്രണംവിട്ട ബസ് തലകീഴായിമറിയുകയായിരുന്നു. അപകടത്തില്‍ 50 ലേറെ പേര്‍ക്ക് പരിക്കേറ്റിരുന്നു.
