കൊച്ചി: ആലുവ പെരിയാറിൽ നിന്ന് മണൽ വാരിക്കടത്തുന്ന സംഘത്തിലെ പ്രധാനികളിലൊരാൾ പിടിയിൽ. ചെങ്ങമനാട് തുരുത്ത് ഓത്തുപള്ളിപ്പറമ്പിൽ റിഷാദ് (36) ആണ് ആലുവ പൊലീസിന്റെ പിടിയിലായത്. മണൽ കടത്താൻ ഉപയോഗിച്ച വാഹനത്തിന്റെ ഉടമയാണ് ഇയാൾ.
വാഹനത്തിന്റെ ഡ്രൈവറായ തലയോലപ്പറമ്പ് കരിപ്പാടൻ പുത്തൻപുരയിൽ ധനേഷ് മുരളീധരനെ (38) പൊലീസ് നേരത്തേ അറസ്റ്റ് ചെയ്തിരുന്നു. ആലുവ, നെടുമ്പാശേരി, ചേരാനല്ലൂർ പൊലീസ് സ്റ്റേഷനുകളിലായി സമാനമായ ഏഴ് കേസുകളിൽ റിഷാദ് ഉൾപ്പെട്ടിട്ടുണ്ടെന്ന് പൊലീസ് അറിയിച്ചു.
ഞായറാഴ്ച പുലർച്ചെ പെരിയാറിൽ നിന്ന് മണൽ വാരിക്കടത്തുകയായിരുന്ന വാഹനം മഹിളാലയം പാലത്തിന് സമീപത്തുവെച്ച് പൊലീസ് പിന്തുടർന്ന് പിടികൂടുകയായിരുന്നു. മണൽ ലോഡ് കൊല്ലം ഭാഗത്തേക്ക് കൊണ്ടുപോകുന്നതിനിടെയാണ് നടപടി.
ഡിവൈഎസ്പി ബൈജു പൗലോസിന്റെ മേൽനോട്ടത്തിൽ സർക്കിൾ ഇൻസ്പെക്ടർ പി.എം. ഷമീർ, എസ്.ഐ. രഞ്ജിത്ത് മാത്യു, സി.പി.ഒമാരായ മാഹിൻ ഷാ അബൂബക്കർ, മുഹമ്മദ് ഷാഹിൻ, ഷിബിൻ തോമസ് എന്നിവരടങ്ങിയ സംഘമാണ് കേസിൽ അന്വേഷണം നടത്തിയത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു. പെരിയാറിലെ അനധികൃത മണൽവാരലിനും കടത്തിനുമെതിരെ ശക്തമായ നടപടി തുടരുമെന്ന് പൊലീസ് അറിയിച്ചു.
