തലസ്ഥാനത്ത് ഇന്നലെ രാത്രി മുതല് അതി ശക്തമഴയായിരുന്നു. നഗരങ്ങളില് പലയിടത്തും വെള്ളക്കെട്ട് രൂപപ്പെട്ടു. താഴ്ന്ന പ്രദേശങ്ങളിലും വെള്ളം കയറി. ടെക്നോപാര്ക്ക് ഫെയ്സ് 3യ്ക്ക് സമീപമുള്ള വീടുകളില് വെള്ളം കയറി. പുലര്ച്ചയോടെ ഇവിടുത്തെ 3 കുടുംബങ്ങളെ ഫയര്ഫോഴ്സ് വാട്ടര് ഡിങ്കിയില് മാറ്റി.
പോത്തന്കോട് കരൂരില് 7 വീടുകളിലാണ് വെള്ളം കയറിയത്. കഴക്കൂട്ടം കുളത്തൂര് പൗണ്ട് കടവില് നിരവധി വീടുകളില് വെള്ളം കയറി. ആളുകളെ മാറ്റി പാര്പ്പിക്കുകയാണ്. തെറ്റിയാര് കരകവിഞ്ഞ് ഒഴുകിയതോടെ സര്വീസ് റോഡില് വെള്ളക്കെട്ട് രൂപപ്പെട്ടു. ടെക്നോപാര്ക്കിലേക്കുള്ള ഭാഗത്ത് വെള്ളക്കെട്ട് രൂപപ്പെട്ടതോടെ സര്വീസ് റോഡ് വഴിയുള്ള ഗതാഗതം നിര്ത്തിവച്ചു.
പേപ്പാറ ഡാമിന്റെ ഷട്ടറുകള് 10 സെ.മി ഉയര്ത്തി. നീരൊഴുക്ക് കൂടിയ സാഹചര്യത്തില് 70 സെ.മി കൂടി ഉയര്ത്തും. സമീപവാസികള് ജാഗ്രത പുലര്ത്തണമെന്ന് നിര്ദേശം നല്കിയിട്ടുണ്ട്. വെള്ളായണിയില് ദുരിതാശ്വാസ ക്യാമ്പ് തുറന്നു. പതിനഞ്ചോളം കുടുംബങ്ങളെ ദുരിതാശ്വാസ ക്യാമ്പിലേക്ക് മാറ്റിയിട്ടുണ്ട്.
9 ജില്ലകളില് ഇന്ന് യെല്ലോ അലേര്ട്ട് മുന്നറിയിപ്പ് നല്കിയിട്ടുണ്ട്. തിരുവനന്തപുരം, കൊല്ലം, ആലപ്പുഴ, കണ്ണൂര്, കാസര്കോട് ഒഴികെയുള്ള ജില്ലകളിലാണ് മുന്നറിയിപ്പുള്ളത്. വരും ദിവസങ്ങളിലും ശക്തമായ മഴ തുടരും. മലയോരമേഖലയില് ഉള്ളവര്ക്ക് ജാഗ്രതാ നിര്ദ്ദേശം നല്കിയിട്ടുണ്ട്.
തെക്കന് തമിഴ്നാട് തീരത്തും കേരളതീരത്തും ഉയര്ന്ന തിരമാലയ്ക്കും ശക്തമായ കടലാക്രമണത്തിനും സാധ്യതയുള്ളതിനാല് മത്സ്യത്തൊഴിലാളികള് ജാഗ്രത പാലിക്കണമെന്നും നിര്ദേശമുണ്ട്. എന്നാല് കേരള, കര്ണാടക തീരങ്ങളില് മത്സ്യബന്ധനത്തിന് തടസ്സമില്ല.
